ტელეწამყვანი ნანუკა ჟორჟოლიანი რუსთავი 2-ის ეთერით, არხის წილების განაწილების პროცესს ეხმაურება. იგი ფეისბუქის საკუთარ გვერდზე წერს, რომ ეთერში არ უნდა გადიოდეს "ვინ როგორ იხეირებს" ტელევიზიაში და არც თავად უნდა მეწილე გახდეს:

"როცა საცვლებს გარეთ ცოლ-ქმარი ფენს არის საშინელი სანახავი და მე ახლა, რუსთავი 2-ის ეთერში ვუყურებ გამოფენილ საცვლებს. თან დასვრილს.

ეს არ არის სიმართლე რასაც მაყურებელი ხედავს. იმიტომ რომ არიან ადამიანები, (ძალიან ბევრნი და მაყურებელი მათ უფრო კარგად იცნობს) რომლებიც არ ეთანხმებიან იმას, რაც ახლა რუსთავი 2-ის ეთერში გადის. ამ მასალის ეთერით გაშვება დარწმუნებული ვარ არ მოსწონს ბევრ რუსთავი 2-ელს. ჩასაფრებულები იტყვიან, რომ ციხე შიგნიდან გატყა. წილებს საჯაროდ იყოფენო. სხვა კი არაფერი უნდოდა იმ ბრძენ კაცს. (მართლა ბრძენია მგონი.)

მეც მოვხვედრილვარ მო-თუ მეწილეთა სიაში. არ მინდა არანაირი წილი, არცერთი მხარის. მინდა ვიყო წამყანი, დაქირავებული თანამშრომელი, რომელიც 12 წლის სტაჟის მიუხედავად, მფლობელს არ ვეუბნები მომცეს ის, რაც მას ეკუთვნის. (უზენაესი სასამართლოს გადაწყვეტილებით სხვას) ხვალ, სხვა კომპანიაში რომ დავიწყო მუშაობა, კომპანიის მფლობელს არ მინდა გაუჩნდეს შიში რომ როდესმე მის საკუთრებას ავახევ.

მოკლედ, არანაირი წილი არ მინდა. არავისი. "წილები გადმომიფორმეს" და მაგიდაზე ხელების ბრახუნის დრო ხომ წარსულს ჩაბარდა".

ნანუკა ჟორჟოლიანის განცხადებას, ასევე ფეისბუქის სტატუსით გამოეხმაურა ნიკა გვარამია და თქვა, რომ არაადეკვატური რეაქციაა, თუკი ვინმეს კოლექტივისთვის მედიის გადაცემის პროცესის გასაჯაროება ბინძური თეთრეულის გამოფენა ჰგონია.

ნანუკა ჟორჟოლიანი შეხვედრას არ ესწრებოდა, თუმცა მაინც მხარი დაუჭირეს მის სიაში ყოფნას. რუსთავი 2-ის თანამშრომლების ნაწილის გადაწყვეტილებით, უნდა შეიქმნას შპს რუსთავი 2 ჩემია. შეხვედრაზე კენჭისყრისას, ხმათა უმრავლესობით გადაწყდა, რომ უმჯობესია ვიწრო წარმომადგენლობა იყოს შპს-ს მფლობელი და არა ტელევიზიის სრული შემადგენლობა.