პრემიერმინისტრი ირაკლი ღარიბაშვილ ამბობს, რომ მიხეილ სააკაშვილის ჰიტლერთან შედარება არარელევანტურია, თუმცა მაინც ადარებს. მისი აზრით, ექსპრეზიდენტი ყველაფერში ბაძავს მას და "გამოდის ფეიკი ჰიტლერი".

ღარიბაშვილს მაგალითად ჰიტლერის შიმშილობა მოჰყავს და ამბობს, რომ ახლა ასე იქცევა სააკაშვილიც, რომელსაც ის "საცოდავს" უწოდებს.

"შედარება მინდა გავაკეთო, ერთი მხრივ პარადოქსულია და აბსოლუტურად არარელევანტური შეიძლება იყოს შედარება სააკაშვილი ჰიტლერთან, მაგრამ ყველაფერში ეს ადამიანი ბაძავს, უბრალოდ, გამოდის ფეიკი ჰიტლერი. როდესაც ჰიტლერი პირველად ჩასვეს ციხეში, მანაც დაიწყო შიმშილობა და ძალიან ბევრი მნახველი მიდიოდა, დაახლოებით იგივე სცენა დადგა ამ საცოდავმა კაცმა ციხეში", — აცხადებს პრემიერმინისტრი.

ღარიბაშვილის თქმით, ჰიტლერისა და სააკაშვილის მასშტაბი ერთნაირია და მესამე პრეზიდენტის გათავისუფლების მოთხოვნა იგივეა, ჰიტლერს მოეთხოვა მეორე მსოფლიო ომის შემდეგ კვლავ ხელისუფლებაში დაბრუნება.

"რა მინდა ვთქვა კიდე, ეს დაახლოებით იგივეა, რომ ჰიტლერს მეორე მსოფლიო ომის შემდეგ მოეთხოვა კიდევ ძალაუფლებაში დაბრუნება, ხელისუფლებაში დაბრუნება და ხალხს რომ დაეჯერებინა, მსოფლიოს რომ დაეჯერებინა. ჩვენ მასშტაბებში დაახლოებით იგივეა, ამ კაცმა დაანგრია ქვეყანა, გადაუარა ქვეყანას, აწამა, ტანჯა, დახოცა პირდაპირ ხალხი და ტერიტორიები დაკარგა, ომი წააგო და ჩააბარა სოფლები, კოდორი, შემდეგ ქვების გროვა უწოდა დაკარგულ ტერიტორიებს", — აცხადებს ღარიბაშვილი.