ევროპარლამენტარი ანა ფოტიგა აცხადებს, რომ საქართველოს ტერიტორიული მთლიანობის სასარგებლოდ ევროკავშირის საერთო უსაფრთხოების და საგარეო პოლიტიკის წლიურ ანგარიშში შესწორება შეიტანა. ტვიტერზე ქართულენოვან პოსტში ფოტიგა აცახდებს, რომ მტკიცედ უჭრს მხარს ქართველი ხალხის ბრძოლას თავისუფლებისთვის და დოკუმენტს აქვეყნებს.

ანა ფოტიგას ინიცირებული შესწორება გმობს საქართველოს ტერიტორიების ოკუპაციას და შეახსენებს რუსეთს 2008 წლის ცეცხლის შეწყვეტის შეთანხმებით ნაკისრ ვალდებულებებს. ასევე, მოუწოდებს რუსეთს, შეწყვიტოს საქართველოს ოკუპირებულ ტერიტორიებზე ადამიანის უფლებების დარღვევა და შეახსენებს სამართლებრივ ვალდებულებას, როგორც ეფექტური კონტროლის განმახორციელებელ ძალას. შესწორება გმობს საოკუპაციო ძალების პროვოკაციებს, მათ შორის, საქართველოს მოქალაქეების გატაცებას, მკვლელობებს, უკანონო დაკავებებსა და ე.წ. ბორდერიზაციას. ამასთანავე მოუწოდებს რუსეთს, იმოქმედოს კონსტრუქციულად და ხელი შეუწყოს პროგრესს ჟენევის საერთაშორისო დისკუსიებში.

ფოტიგას ტვიტს წინ უძღოდა მმართველი გუნდის მორიგი თავდასხმა და კრიტიკა ევროპარლამენტერებისადმი, კერძოდ, პრემიერმინისტრის განცხადება იმაზე, რომ "არც ფოტიგა და არც კუბილიუსი ჩვენი ქვეყნისთვის არაფერს წარმოადგენენ". მისი თქმით, ამ ევროპარლამენტარების ჭკუით არ ივლის და სჯობს, მათ საკუთარ ქვეყანას მიხედონ.

გარდა ამისა მან 19 ოქტომბერს თქვა ისიც, რომ "ვიღაც ევროპარლამენტარებიი ბრძნული სახით გვაძლევს ბრძნულ რჩევებს" და ეს მუდმივი სპეკულაციის საგანია. პრემიერმა ხაზი გაუსვა, რომ მისთვის ევროპარლამენტარების ნათქვამს არავითარი მნიშვნელობა არ აქვს.

ევროპარლამეტარებისადმი მმართველი გუნდის რიტორიკა რომ მსგავსია ამას ადასტურებს პარტიის თავმჯდომარის, ირაკლი კობახიძის განცხადებებიც. მან ისინი "ნაცმოძრაობის ლობისტებად" მოიხსენია და თქვა, რომ ქართული მართლმსაჯულების პოლიტიზებას ვეღარასდროს განახორციელებენ. პარტიის ერთ-ერთმა ლიდერმა, გია ვოლსკიმ კი მათ ღია წერის ექსპრეზიდენტ მიხეილ სააკაშვილის მხარდასაჭერად ფარისევლური უწოდა.

ამავე თემაზე: