18 ოქტომბერს ლოს-ანჯელესში 2021 წლის ერთ-ერთი ყველაზე მაღალი მოლოდინების მქონე ფილმის — Eternals (მარადიულები) პრემიერა შედგა.

ოსკაროსანი ქლოა ჭაოს მიერ მარველისთვის გადაღებულ ამ ახალ ბლოკბასტერში ისეთი ცნობილი სახეები მონაწილეობენ, როგორებიც ანჯელინა ჯოლი, ჯემა ჩანი, რიჩარდ მადენი, სელმა ჰაიეკი და კიტ ჰარინგტონი არიან.

ფილმის პრემიერაც, ცხადია, ამ კაშკაშა ვარსკვლავებით იყო დახუნძლული.

ფოტო: Alberto E. Rodriguez / Getty Images

თუმცა ეს საღამო ერთმა ემოციურმა დეტალმა ლამის მთლიანად გადაფარა.

როგორც უკვე აღვნიშნეთ, ანჯელინა ჯოლი მარველის ამ ახალ ფილმში ერთ-ერთ როლს ასრულებს და პრემიერაზეც თავის ხუთ შვილთან ერთად გამოცხადდა.

ფოტო: Jesse Grant / Getty Images

გარდა იმისა, რომ ეს საერთო ოჯახური მომენტი თავისთავად ყურადსაღები იყო, მალევე შენიშნა ბევრმა კიდევ ერთი განსაკუთრებული რამ: ანჯელინა ჯოლის ერთ-ერთ შვილს, სახელად ზაჰარას, დედის ძველი კაბა ეცვა, რომლითაც ანჯელინა 2014 წელს გამოჩნდა ოსკარების დაჯილდოებაზე.

ფოტო: Wally Skalij / Los Angeles Times

ანჯელინა ჯოლიმ იქვე ჟურნალისტთან მიცემულ ინტერვიუში აღნიშნა, რომ ყველას — მის შვილებსა და მას — ძველი, უკვე გამოყენებული სამოსი ეცვა და არა ახალი, როგორც ეს ასეთ ღონისძიებებზეა მიღებული ხოლმე.

ბევრმა მარტივად შენიშნა ისიც, რომ ზაჰარა არ იყო ერთადერთი, რომელსაც დედის ძველი სამოსი ეცვა: ანჯელინას კიდევ ერთ შვილს ეცვა მისი კაბა, რომლითაც თავად გასულ ზაფხულს საფრანგეთში გამოჩნდა.

ფოტო: EMMA MCINTYRE/WIREIMAGE

ანჯელინა ჯოლის აქამდეც უსაუბრია ამ საკითხზე და ამჯერადაც აჩვენა ყველას, რომ მისთვის გარემოსდაცვითი საკითხები მნიშვნელოვანია და ჭარბი მოხმარების, მათ შორის ტანსაცმლის, შემცირებას ცდილობს.

ეს 46 წლის მსახიობი ხშირად იმასაც აღნიშნავს, რომ თავისი 16 წლის შვილთან, ზაჰარასთან, განსაკუთრებული სიახლოვე აქვს, ამიტომ გასაკვირიც არ არის, გარდერობსაც რომ იყოფენ.

ფოტო: Jon Kopaloff / WireImage