შინაგან საქმეთა სამინისტროს ინფორმაციით, 18 ოქტომბერს, თბილისში მომხდარი მკვლელობის ფაქტზე სამი ადამიანი დააკავეს. პოლიციელებმა დაკავებულების საცხოვრებელი სახლების ჩხრეკისას დიდი ოდენობით ნარკოტიკული საშუალება და ხელყუმბარები ამოიღეს.

"გამოძიებით დადგინდა, რომ ბ.ლ.-მ მიმდინარე წლის 18 ოქტომბერს თბილისში, გაზაფხულის ქუჩაზე, უცხო ქვეყნის მოქალაქეს, 1994 წელს დაბადებულ, ა.შ.-ს ცეცხლსასროლი იარაღიდან რამდენჯერმე ესროლა, მიღებული დაზიანებების შედეგად ა.შ. ადგილზე გარდაიცვალა.

გამოძიებით ასევე დადგინდა, რომ დანაშაულის ჩადენის შემდეგ ბ.ლ.-მ შემთხვევის ადგილი ბ.ხ.-ს მართვის ქვეშ მყოფი ავტომობილით დატოვა, რა დროსაც ბ.ხ.-ს მის მიერ ჩადენილი მკვლელობის შესახებ მოუყვა", — ვკითხულობთ შსს-ს განცხადებაში.

უწყების თქმით, ანასტასია შატალოვას მკვლელობაში ბრალდებული საკუთარ სახლში, ბინის ჩხრეკის დაწყებამდე ფანჯრიდან გადახტომის მცდელობის დროს დააკავეს. აღსანიშნავია, რომ პოლიციამ მისი პირადი ჩხრეკისას, განსაკუთრებით დიდი ოდენობით ნარკოტიკული საშუალება ამოიღო.

შსს-ს ცნობით, მკვლელობაში ბრალდებულის დაკავების შემდეგ დამატებითი მტკიცებულებების მოპოვების მიზნით, ბ.ხ.-ს მეგობრის, ლ.რ.-ის ბინა გაჩხრიკეს. პოლიციას ორივე მათგანი ადგილზე დახვდა, თუმცა საგამოძიებო მოქმედებების დროს ბ.ხ. აივანზე გადახდა და მიმალვა სცადა, იქამდე კი კორპუსის ქვემოთ, პერიმეტრზე მყოფი სამართალდამცველების მიმართულებით ხელყუმბარა ისროლა.

"პოლიციამ ბ.ხ. მიმალვის მცდელობის დროს, მეზობელი საცხოვრებელი ბინის აივანზე დააკავა და მისი პირადი ჩხრეკის შედეგად კიდევ ერთი ხელყუმბარა ამოიღო.

პოლიციის თანამშრომლებს ფიზიკური წინააღმდეგობა გაუწია და ბ.ხ.-ს დაკავებაში სამართალდამცველებს ხელი შეუშალა ბინის მეპატრონე - ლ.რ.-მ. პოლიციელების მიმართ გაწეული წინააღმდეგობისთვის იგი ადგილზე იქნა დაკავებული. მისი პირადი ჩხრეკისას ამოღებულია, განსაკუთრებით დიდი ოდენობით ნარკოტიკული საშუალება", — ვკითხულობთ შსს-ს განცხადებაში.

ხელყუმბარები გამნაღმველებმა გააუვნებელყვეს.

გამოძიება საქართველოს სისხლის სამართლის კოდექსის 108-ე, 19-353 პრიმა, 353-ე, 236-ე, 260-ე და 375-ე მუხლებით მიმდინარეობს.

ანასტატია შატალოვა 18 ოქტომბერს, გვიან ღამით თბილისში, გაზაფხულის ქუჩაზე მოკლეს. შსს ორი დღის განმავლობაში დუმდა — ვიცოდით მხოლოდ ის, რომ გამოძიება განზრახ მკვლელობის მუხლით იყო დაწყებული დაიწყო. უწყება არაფერს ამბობდა ბრალდებულებზე, თუმცა გავრცელდა ინფორმაცია სამი დაკავებულის შესახებ, რომლებსაც გამოძიება თავდაპირველად სხვადასხვა დანაშაულს ედავებოდა, მოგვიანებით კი ერთ-ერთს განზრახ მკვლელობის მუხლით წარედგინა ბრალი.