სამხრეთ კავკასიასა და ცენტრალურ აზიაში NATO-ს გენერალური მდივნის სპეციალურმა წარმომადგენელმა, ხავიერ კოლომინამ განაცხადა, რომ რუსეთი საფრთხეს უქმნის რეგიონის სტაბილურობას. მან საქართველოსთან ერთად უკრაინა და მოლდოვა მოიყვანა მაგალითად.

"საქართველო და ნატო შეშფოთებულნი არიან რუსეთის საგარეო უსაფრთხოების პოლიტიკით. ამ რეგიონში, რუსეთი ხშირად იყენებს ძალის გამოყენების მუქარას და საფრთხეს უქმნის სტაბილურობის შენარჩუნებას, როგორც საქართველოში, ისე რეგიონის სხვა ქვეყნებში, მაგალითად უკრაინაში და მოლდოვას რესპუბლიკაში", — განაცხადა კოლომინამ.

საგარეო საქმეთა მინისტრთან, დავით ზალკალიანთან შეხვედრის შემდეგ კოლომინამ, ასევე, განაცხადა, რომ საქართველოს ძალიან მნიშვნელოვანი როლი აქვს სამხრეთ კავკასიის რეგიონის უსაფრთხოებაში.

"მე მადლობა გადავუხადე მინისტრს საქართველოს მხრიდან წარმოდგენილი, სამხრეთ კავკასიის სამ ქვეყანას შორის პოლიტიკური კონსულტაციების გამართვის შესახებ ინიციატივისთვის. საქართველო ნამდვილად ძალიან მნიშვნელოვან და აქტიურ როლს თამაშობს სომხეთსა და აზერბაიჯანს შორის ურთიერთობების მიმართულებით და მინდა ამისთვისაც კიდევ ერთხელ დიდი მადლობა გადაგიხადოთ", — განაცხადა კოლომინამ.

ხავიერ კოლომინა საქართველოს რეგიონული ტურნეს ფარგლებში ეწვია. იგი უკვე იმყოფებოდა აზერბაიჯანში, ხვალ კი სომხეთში გაემგზავრება.