მამა მიქაელ ბოტკოველმა გადაწყვეტილება შეცვალა და ის საქართველოს მართლმადიდებლურ ეკლესიაშია პატრიარქის პრესმდივნის თანამდებობას ბრუნდება. ამის შესახებ On.ge-ს საპატრიარქოში განუცხადეს.

მათივე ინფორმაციით, საქართველოს მართლმადიდებლურ ეკლესიაში ბოტკოველს თანამდებობა ოფიციალურად დატოვებული არ ჰქონდა და პატრიარქის, ილია მეორის თხოვნის შემდეგ დაბრუნების გადაწყვეტილება მიიღო.

On.ge-ს სურდა ბოტკოველსაც გასაუბრებოდა, თუმცა, მას მობილური ტელეფონი გამორთული აქვს.

პატრიარქის პრესმდივანმა, მიქაელ ბოტკოველმა თანამდებობის დატოვების შესახებ 23 თებერვალს ისაუბრა.

"მე პროტესტის ნიშნად ვტოვებ საპატრიარქოს და მე ამიერიდან აღარ ვარ კათოლიკოს პატრიარქის მდივანი. პატრიარქის დაცვის უფროსი [სოსო ოხანაშვილი], რომ იტყვის პატრიარქის მდივანზე, რომ ის [მდივანი] არის ცრუ და მატყუარა ადამიანი, ეს არის სწორედ ის პრობლემა, რომელზეც საქართველოს საპატრიარქოში ვსაუბრობთ. პატრიარქის დაცვის უფროსი სუბორდინაციულად არის პატრიარქის მდივნის დაქვემდებარებაშიც," - ამბობდა ის.

ამ განცხადებიდან რამდენიმე დღეში სოსო ოხანაშვილმაც დატოვა თანამდებობა.