სექტემბერში უცხოეთიდან საქართველოში 209,7 მილიონი დოლარის ფულადი გზავნილი გადმოირიცხა, რაც რეკორდულად მაღალი მაჩვენებელია. ეროვნული ბანკის ინფორმაციით, სექტემბერში მიღებული ფულადი გზავნილების მოცულობა წლიურად 8,8%-ით არის გაზრდილი ($17 მლნ).

ქვეყნებს შორის, ყველაზე მეტი გზავნილი რუსეთიდან ($38,6 მილიონი), იტალიიდან ($34 მილიონი) და აშშ-დან ($24,5 მილიონი) გადმოირიცხა. როგორც წესი, ფულადი გზავნილების მოცულობა იმ ქვეყნებიდან ჭარბობს, სადაც საქართველოდან წასული ყველაზე მეტი ემიგრანტი ცხოვრობს.

რაც შეეხება იანვარ-სექტემბრის სტატისტიკას, უცხოეთიდან მიმდინარე წლის პირველ ცხრა თვეში 1,7 მილიარდი დოლარია გადმორიცხული, რაც გასული წლის იმავე პერიოდის მონაცემს 27,8%-ით აღემატება.

აღსანიშნავია, რომ მიმდინარე წლის სექტემბერში საქართველოდან უცხოეთში 29,2 მილიონი დოლარი გადაირიცხა. ქვეყნებს შორის, ყველაზე მეტი თანხა რუსეთსა ($7,8 მილიონი) და თურქეთში ($7 მილიონი) გაიგზავნა.