ქართული ოცნების წევრი ირაკლი ზარქუა ამბობს, რომ ყოფილი პრეზიდენტი მიხეილ სააკაშვილი "კალორიულ კვებაზეა" გადასული. მისივე თქმით, პენიტენციარულ სისტემაში ყველას უფლება დაცულია.

"მე რამდენადაც მაქვს ინფორმაცია, საკმაოდ კალორიულ კვებაზე არის გადასული — თაფლი, ხილი და ა.შ. არ ვიცი, არ მგონია, თუ რამე პრობლემა არის, დღეს გვაქვს ჩვენ ის პენიტენციარული სისტემა სადაც თითოეული მსჯავრდებულის უფლებები არის დაცული", — თქვა ზარქუამ.

ამ თემაზე ზარქუამ მას შემდეგ ისაუბრა, რაც სახალხო დამცველმა თქვა, რომ პენიტენციური სამსახურისა თუ მაღალი პოლიტიკური თანამდებობის პირების მხრიდან ექსპრეზიდენტზე გაკეთებული განცხადებებით, იქმნება დამატებითი საფრთხე, რომ მოშიმშილე სააკაშვილმა უარი თქვას სამედიცინო მომსახურების მიღებაზეც. ომბუდსმენი უარყოფითად აფასებს ნებისმიერი სახის განცხადებას, რომელიც "უბიძგებს პატიმარს უფრო მძიმე შიმშილობის ფორმაზე გადასვლას და კიდევ უფრო ამძიმებს ბრალდებულის/მსჯავრდებულის ჯანმრთელობის მდგომარეობას".

მიხეილ სააკაშვილი 13 დღეა შიმშილობს. 10 ოქტომბერს, მისმა პირადმა, ექიმმა ნიკოლოზ ყიფშიძემ თქვა, რომ ექსპრეზიდენტის მდგომარეობა დამძიმდა. როგორც ექიმი განმარტავს, ეს შიმშილობის გამო მოხდა და მას უჭირს საუბარი და მოძრაობა. პასუხად პენიტენციური სამსახური ამტკიცებს, რომ ეს ინფორმაცია სიმართლეს არ შეესაბამება. მათი თქმით, როგორც მოშიმშილე, სააკაშვილი მუდმივად იმყოფება სამედიცინო პერსონალის დაკვირვების ქვეშ და მდგომარეობა დამაკმაყოფილებელია.

მომდევნო დღეს სააკაშვილის ადვოკატმა, ნიკა გვარამიამ განაცხადა, რომ ექსპრეზიდენტის ჯანმრთელობის მდგომარეობა დამაკმაყოფილებელია და ამ საკითხებით უტრირება არ ღირს.

გარდა ამისა, 8 ოქტომბერს პენიტენციულმა სამსახურმა გაავრცელა ინფორმაცია, რომ სააკაშვილმა ციხის მაღაზიაში 7 ქილა თაფლი შეიძინა და დაწყებული აქვს საკვების მიღება. ამას უპასუხა სააკაშვილის ექიმმა და თქვა, რომ თაფლს მხოლოდ ერთ კოვზს იღებდა და ჩაიში აგდებდა. მისივე თქმით, ამ ინფორმაციაზე სპეკულაციების შემდეგ სააკაშვილმა თაფლის მიღებაც შეწყვიტა.

ამავე თემაზე: