გორის რაიონულმა სასამართლომ ბრიტანელი ტურისტის მკვლელობაში ბრალდებულებს აღკვეთის ღონისძიების სახით პატიმრობა შეუფარდა. ინფორმაცია On.ge-ის სასამართლოში დაუდასტურეს.

შინაგან საქმეთა სამინისტრომ აღნიშნულზე 5 პირი 10 ოქტომბერს დააკავა. უწყების ცნობით, 4 პირს ბრალი ედება დამამძიმებელ გარემოებაში ჯგუფურად ჩადენილი განზრახ მკვლელობაში, ხოლო მეხუთე ბრალდებულს განსაკუთრებით მძიმე დანაშაულის შეუტყობინებლობაში.

გამოძიების ვერსიით, მათ 7 ოქტომბერს უცხო ქვეყნის მოქალაქეს სცემეს და მტკვარში გადააგდეს. მათივე ინფორმაციით, დანაშაულებრივი ქმედების შესახებ ინფორმაციას ფლობდა ვ.ო., თუმცა ამის შესახებ სამართალდამცველებს არ შეატყობინა.

ტურისტის ცხედარი მდინარე მტკვარმა მიმდინარე წლის 8 ოქტომბერს, გორის მუნიციპალიტეტის სოფელ ქვახვრელის მიმდებარე ტერიტორიაზე გამორიყა.