სახელმწიფო უწყებები, სავარაუდოდ, 2017 წელსაც მაგთის ან ჯეოსელის მომსახურებით ისარგებლებენ. სახელმწიფოს კონსოლიდირებულ ტენდერში, რომელშიც წინადადებების მიწოდების დრო რამდენიმე საათის წინ ამოიწურა, მხოლოდ ეს ორი კომპანია მონაწილეობს, მათ კონკურენტს - ბილაინს (შპს მობიტელი) მონაწილეობის სურვილი არ გამოუთქვამს.

სატენდერო წინადადების მიხედვით, გამარჯვებულმა კომპანიამ, 2017 წლის პირველი აპრილიდან 2018 წლის 31 იანვრის ჩათვლით, 260 ათასი აბონენტისთვის GSM, UMTS, LTE სტანდარტებით მომსახურება უნდა უზრუნველყოს. ქსელის დაფარვის არეალი უნდა იყოს ქვეყნის არანაკლებ 90 პროცენტი და დასახლებული ტერიტორიის არანაკლებ 95 პროცენტი. გარდა ამისა, გამარჯვებულმა კომპანიამ უნდა უზრუნველყოს: 2G/GSM, 3G/UMTS და 4G/LTE ინტერნეტის მომსახურების გაწევა.

საქართველოს კომუნიკაციების ეროვნულ კომისიაში ამბობენ, რომ კომისია შეისწავლის სატენდერო წინადადებას და თუ მიიჩნევს, რომ ის წინააღმდეგობაში მოდის არსებულ რეგულაციებთან, უფლებამოსილების ფარგლებში ჩაერთვება. როგორც კომისიაში აღნიშნავენ, ახალი სატენდერო წინადადების გამოქვეყნებამდე კონსულტაციები გაიმართა.

იმავე მომსახურებაზე კონსოლიდირებული ტენდერი რამდენიმე თვის წინათაც გამოცხადდა. მაშინ ტენდერში მონაწილეობა მხოლოდ ბილაინმა მიიღო, რომელიც, სატენდერო კომისიის გადაწყვეტილებით, პირობებს ვერ აკმაყოფილებდა.

სახელმწიფო შესყიდვების სააგენტოს ვებგვერდზე სატელეკომუნიკაციო მომსახურების შესახებ ბოლო 5 წლის განმავლობაში განხორციელებული კონსოლიდირებული ტენდერების ნახვაა შესაძლებელი. ყველა ტენდერში გამარჯვებული ხან ჯეოსელი ხდებოდა და ხან – მაგთიკომი.