რამდენიმე დღის წინ გავრცელდა ინფორმაცია, რომ ჰაკერულმა დაჯგუფებამ, რომელიც საკუთარ თავს Turkish Crime Family-ის უწოდებს, გამოაცხადა, რომ iCloud-ის 300 მილიონი ანგარიში გატეხა.

ჰაკერები ეფლისგან გამოსასყიდ თანხას ითხოვენ. მათი თქმით, თუ 7 აპრილამდე $75 ათასის ღირებულების ბიტკოინი არ ჩაერიცხებათ ან $100 ათასის ღირებულების iTunes-ის სასაჩუქრე ბარათების კოდები არ გადაეცემათ, მათ ხელთ არსებულ სამას მილიონივე ანგარიშში არსებულ ინფორმაციას წაშლიან.

Fortune-თა საუბრისას, ეფლის ოფიციალურმა წარმომადგენელმა განაცხადა, რომ კომპანიის სისტემაში, არც iCloud-ისა და არც Apple ID სისტემებში არანაირი არაავტორიზებული შეღწევა არ დაფიქსირებულა. მისი თქმით, ჰაკერები ძველ მონაცემებს იყენებენ, რომელიც 2012 წელს არა ეფლის არამედ LinkedIn-ის გატეხვის შედეგად მოიპოვეს.

საქმე ისაა, რომ ჰაკერები ხშირად იყენებენ ძველი თავდასხმების შედეგად მოპოვებულ მონაცემებს იმისთვის, რომ გარკვეული კომპანიები დააშანტაჟონ, ხალხში პანიკა გამოიწვიონ ან საკუთარი თავი გააპიარონ.

ეფლის ოფიციალური განცხადებით, კომპანიის iCould სერვერები მუდმივი მონიტორინგის ქვეშაა და არაავტორიზებული შეღწევის ნებისმიერი მცდელობა აღკვეთილი იქნება.