ქართული ოცნების საზოგადოებასთან ურთიერთობის მდივანი, შალვა პაპუაშვილი აცხადებს, რომ ზუგდიდის ოლქში განვითარებული მოვნელები ნაციონალური მოძრაობის მხრიდან საარჩევნო ადმინისტრაციის საქმიანობაში ჩარევა და თანამშრომლებზე ზეწოლაა. პაპუაშვილმა სამართალდამცავ ორგანოებს უმკაცრესი რეაგირებისკენ მოუწოდა.

"რაც შეეხება ნაციონალური მოძრაობის წევრების ქმედებებს, საოლქო საარჩევნო კომისიაში, ეს არის პირდაპირი ძალადობრივი ჩარევა საარჩევნო ადმინისტრაციის საქმიანობაში და ზეწოლა ადმინისტრაციის თანამშრომლებზე. მოვუწოდებთ სამართალდამცავ ორგანოებს, ასეთ ფაქტებზე ჰქონდეთ უმკაცრესი რეაგირება, რათა საფრთხე არ შეექმნას ჩვენი მოქალაქეების მიერ 2 ოქტომბერს გამოხატული ნების დაცულობას", — აცხადებს დეპუტატი.

შალვა პაპუაშვილის თქმით, გადათვლამდე ნაციონალური მოძრაობის კანდიდატი 2 ხმით ლიდერობდა, გადათვლის შემდეგ კი ქართული ოცნების კანდიდატს 13 ხმა დაემატა.

პაპუაშვილმა განაცხადა, რომ ქართულმა ოცნებამ წერილობით მიმართა ეუთო ოდირის გრძელვადიან დამკვირვებლებს და ადგილობრივ სადამკვირვებლო ორგანიზაციებს, კომუნიკაცია იქონიონ ნაციონალურ მოძრაობასთან, რათა მათ შეწყვიტონ "საარჩევნო პროცესის ჩაშლის მცდელობები".

დღეს ზუგდიდის საოლქო საარჩევნო კომისიაში ხმაური იყო. როგორც ნაციონალური მოძრაობის დეპუტატმა, ანა წითლიძემ On.ge-სთან განაცხადა, საოლქო საარჩევნო კომისიამ ქართულ ოცნებას ყოველგვარი სამართლებრივი საფუძვლის გარეშე მისცა თანხმობა ოლქის გადათვლაზე.

წითლიძე ამტკიცებს, რომ აღნიშნულ ოლქში დალუქული ოთახი გახსნილი იყო და მათი მისვლისას კომისიის თავმჯდომარის მოადგილე და კომისიის წევრები ბიულეტინებში იქექებოდნენ. ადგილზე მყოფ ოპოზიციონერებს კომისიის თავმჯდომარესთან სურდათ შეხვედრა, თუმცა შეხვედრა არ შედგა, რადგან წითლიძის თქმით, ის ოთახში ჩაიკეტა და მათ კითხვებს არ უპასუხა.

ნაციონალური მოძრაობის თავმჯდომარემ, ნიკა მელიამ დღეს ზუგდიდში გამართულ ბრიფინგზე განაცხადა, რომ აღნიშნულით პირველ ტურში გამარჯვებული დეპუტატი დამარცხებულად გამოაცხადეს და ხვალ, 9 ოქტომბერს, ზუგდიდში აქცია დააანონსა.