ზუგდიდის საოლქო საარჩევნო კომისიაში ხმაური იყო. როგორც ნაციონალური მოძრაობის დეპუტატმა, ანა წითლიძემ On.ge-სთან განაცხადა, ხმაური ხმების უკანონო გადათვლამ გამოიწვია.

"ხმაური გამოიწვია იმან, რომ მე-11 მაჟორიტარული ოლქი ყოველგვარი სამართლებრივი საფუძვლის გარეშე ქართულმა ოცნებამ მოითხოვა გახსნა, გადათვლა და საოლქო საარჩევნო კომისიამ ყოველგვარი სამართლებრივი საფუძვლის გარეშე მისცა თანხმობა ამ ოლქის გადათვლაზე. საბოლოოდ აღმოჩნდა, რომ გუშინ რომ გადათვალეს ეს ოლქი, დალუქული ბიულეტინები რომელიც უნდა ყოფილიყო, იყო ჩვეულებრივად გახსნილი და მასში ჩამატებული იყო ქართული ოცნების სასარგებლოდ ბიულეტინები, ბათილ ბიულეტინებში", — აცხადებს წითლიძე.

მისი თქმით, აღნიშნულ ოლქში დალუქული ოთახი გახსნილი იყო და მათი მისვლისას კომისიის თავმჯდომარის მოადგილე და კომისიის წევრები ბიულეტინებში იქექებოდნენ.

"დალუქული ოთახი, სადაც ეს ბიულეტინები იყო, საარჩევნო ბიულეტინები, რომელიც დალუქულ მდგომარეობაში უნდა იყოს, კარი დალუქული უნდა იყოს და არავის არ უნდა შეეძლოს მანდ შესვლა, სანამ შემაჯამებელი არ იქნება, მივედით და იყო გახსნილი, კომისიის თავმჯდომარის მოადგილე და კომისიის წევრები კი უბრალოდ, ამ ბიულეტინებში იქექებოდნენ და ვერ ვხვდებოდით რას შვრებოდნენ. რომ ვკითხეთ, თუ რას აკეთებდნენ, გვითხრეს, რომ თბილისმა რაღაც დაავალა და ეძებდნენ", — ამბობს დეპუტატი.

ადგილზე მყოფ ოპოზიციონერებს კომისიის თავმჯდომარესთან სურდათ შეხვედრა, თუმცა შეხვედრა არ შედგა, რადგან წითლიძის თქმით, ის ოთახში ჩაიკეტა და მათ კითხვებს არ უპასუხა.

ნაციონალური მოძრაობის თავმჯდომარემ, ნიკა მელიამ დღეს ზუგდიდში გამართულ ბრიფინგზე განაცხადა, აღნიშნულით პირველ ტურში გამარჯვებული დეპუტატი დამარცხებულად გამოაცხადეს.

"პირველ ტურში გამარჯვებული მაჟორიტარი გუშინ ღამით ქურდულად საარჩევნო ზონდერებმა ხელოვნურად პროცესი დაძრეს ხმის გადათვლისა, გადაითვალეს თითქოს ხმები და პირველ ტურში გამარჯვებული დეპუტატი გამოაცხადეს პირველ ტურში დამარცხებულ დეპუტატად. წარმოუდგენელი რამ ჩაიდინეს. უბანზე, სადაც მანუჩარ ფიფიამ გამარჯვება მოიპოვა მის ოლქში, ისე დაიწყო და დასრულდა არჩევნები, ქართული ოცნების დამკვირვებლებმა და ისინი უმრავლესობით არიან იქ წარმოდგენილი, ჩვიდმეტნი იყვნენ თავის კომისიის წევრებიანად, დამკვირვებლებიანად და წარმმადგენლებიანად. 1 საჩივარი არ დაუწერიათ 2 ოქტომბერს", — აცხადებს მელია.

მანვე ხვალ, 9 ოქტომბერს, ზუგდიდში აქცია დააანონსა აღნიშნულის გასაპროტესტებლად.

ცენტრალურ საარჩევნო კომისიაში ზუგდიდში მომხდართან დაკავშირებით ამბობენ, რომ კომისიამ საარჩევნო სუბიექტებისა და სადამკვირვებლო ორგანიზაციების საჩივრები კანონის სრული დაცვით განიხილა.

"ზუგდიდის საოლქო საარჩევნო კომისიაზე ზეწოლა ჯერ კიდევ გუშინ დაიწყო, როდესაც კომისიამ კანონის სრული დაცვით განიხილა როგორც საარჩევნო სუბიექტების, ისე სადამკვირვებლო ორგანიზაციების საჩივრები, რომლებიც 4 საარჩევნო უბანზე ბათილი ბიულეტენების გადათვლა/გადამოწმებას შეეხებოდა, ერთ-ერთი პოლიტიკური ძალის მხრიდან ადგილი ჰქონდა უსაფუძვლო ბრალდებებს და მანიპულაციას, თითქოს, ბათილი ბიულეტენები გახსნილი და ხელახლა დალუქული იყო, ასევე თითქოს შედეგები "ქართული ოცნების" სასარგებლოდ გადაკეთდა", — ამბობენ ცესკოში.

მათივე თქმით, ზუგდიდის საოლქო საარჩევნო კომისიაში დალუქული კონვერტები და ბათილი ბიულეტინები გამჭვირვალედ დათვალეს.

"რეალურად პროცესი ზუგდიდის საოლქო საარჩევნო კომისიაში, — დალუქული კონვერტების გახსნა და ბათილი ბიულეტენების დათვლა მოხდა გამჭვირვალედ, სადამკვირვებლო ორგანიზაციების და მედიის თანდასწრებით, სადაც ნათლად ჩანდა ყველაფერი და გადაწყვეტილება საოლქო კომისიამ ხმათა უმრავლესობით, მსჯელობის შემდეგ მიიღო", — აცხადებენ ისინი.

2 ოქტომბერს საქართველოში ადგილობრივი თვითმმართველობის არჩევნები გაიმართა. მოსახლეობა მერებსა და საკრებულოების წევრებს ირჩევდა. თუმცა ამჯერად ეს არ არის მხოლოდ თვითმმართველობის არჩევნები — მიუხედავად იმისა, რომ ქართულმა ოცნებამ შარლ მიშელის შეთანხმება ანულირებულად გამოაცხადა, ოპოზიცია ამ არჩევნებს რეფერენდუმს უწოდებს. სწორედ ამ დოკუმენტის მიხედვით, იმ შემთხვევაში, თუ ქართული ოცნება თვითმმართველობის არჩევნებზე 43%-ზე ნაკლებს აიღებდა, რიგგარეშე არჩევნები უნდა ჩატარებულიყო.

ცენტრალური საარჩევნო კომისიის მონაცემებით, თვითმმართველობის არჩევნების მეორე ტური 20 მუნიციპალიტეტში გაიმართება. მეორე ტური ჩატარდება თბილისშიც.