ევროპარლამენტარები ანდრიუს კუბილიუსი და რასა იუკნევიჩიენე საქართველოში გამართულ არჩევნებს, ექსპრეზიდენტ მიხეილ სააკაშვილის საქართველოში ჩამოსვლას, დაკავებასა და პრემიერმინისტრის, ირაკლი ღარიბაშვილის განცხადებებს ეხმაურებიან. მათ წერილში ვკითხულობთ, რომ სააკაშვილის საქმე პოლიტიკურად მოტივირებულის ელფერს აჩენს და ღარიბაშვილის მუქარა მიუღებელია.

ევროპარლამენტარები აღნიშნავენ, რომ იზიარებენ არჩევნებზე ეუთო/ოდირისა და აშშ-ის საელჩოს შეფასებებს და აცხადებენ, რომ ქართველი ამომრჩეველი იმსახურებს უფრო მაღალ სტანდარტს საარჩევნო პროცესში. მათ თქმით, დამოუკიდებელი დამკვირვებლების გამოვლენილი მნიშვნელოვანი ნაკლოვანებები უნდა გამოსწორდეს არჩევნების მეორე ტურამდე, რათა უზრუნველყოფილი იყო თავისუფალი და სამართლიანი საარჩევნო პროცესი.

"ჩვენ ველით, რომ ყოფილი პრეზიდენტის სააკაშვილის სამართლებრივი საქმე საქართველოში გამოძიებული იქნება ევროპული მართლმსაჯულების სისტემის პრინციპების შესაბამისად. სამწუხაროდ, ჩვენ შეშფოთებით უნდა აღვნიშნოთ პრემიერმინისტრ ირაკლი ღარიბაშვილის ბოლოდროინდელი საჯარო მუქარა ბატონი სააკაშვილის მიმართ დამატებითი ბრალდებებით, თუ ის არ "მოიქცევა" [კარგად]. ეს აჩვენებს, რომ ბატონი სააკაშვილის წინააღმდეგ საქმე ფაქტობრივად პოლიტიკურია, რაც სავალალოა და შეუთავსებელია ევროკავშირის ასოცირებული ქვეყნის სტატუსთან.

ეს არის ნათელი მტკიცებულება იმისა, რომ ქართული ოცნების ხელმძღვანელობას ჯერ კიდევ არ შეუძლია გადალახოს სამართლიანობის პოლიტიზირების ცდუნება, რომელიც არ შეესაბამება კანონის უზენაესობისა და ევროპული ტიპის მართლმსაჯულების პრინციპებს. ევროკავშირის ნებისმიერ ქვეყანაში, მთავრობის წარმომადგენლისგან მსგავსი განცხადების შედეგი იქნება მისი დაუყოვნებლივ გადადგომა", — ვკითხულობთ განცხადებაში.

ევროპარლამენტარები აღნიშნავენ, რომ ქართული ოცნების ლიდერების პირადი თავდასხმები ოპოზიციური პარტიების ლიდერების წინააღმდეგ და ვარდების რევოლუციის მიღწევების დაკნინება უბრალოდ ამაზრზენია.

"დემოკრატიის სიმწიფე და ევროპული ტიპის კანონის უზენაესობა არის ევროპული ინტეგრაციის წინაპირობა. ქართული ოცნება ისევ და ისევ ვერ ადასტურებს, რომ მათ შეუძლიათ შეასრულონ ეს პირობები", — აცხადებენ ისინი.

ისინი მოუწოდებენ ყველა პოლიტიკურ ძალას, რომ ნორმალური დემოკრატიული დიალოგის უზრუნველსაყოფად ხიდების მშენებლობა დაიწყონ და დაუბრუნდნენ პროევროპული რეფორმების გზას.

"მნიშვნელოვანია, რომ საქართველომ არ დაკარგოს უკვე მიღწეული შედეგები. ჩვენი მხრივ, ჩვენ მზად ვართ გავაგრძელოთ საქართველოს ევროატლანტიკური ამბიციების მხარდაჭერა, მაგრამ ჩვენ ხაზს ვუსვამთ, რომ ამ გზაზე წარმატება მხოლოდ მმართველი პარტიისა და ოპოზიციის, ყველა პროევროპული პოლიტიკური ძალის ერთობლივი და თანმიმდევრული ძალისხმევით იქნება შესაძლებელი", — ვკითხულობთ განცხადებაში.

3 ოქტომბერს, პრემიერმინისტრი ირაკლი ღარიბაშვილი ციხეში მყოფ ექსპრეზიდენტ მიხეილ სააკაშვილს დაეთქვამუქრა და თქვა, რომ "წესიერად უნდა მოიქცეს", წინააღმდეგ შემთხვევაში მას სხვა მუხლები დაემატება. სწორედ ამას ეხმიანებიან ევროპარლამენტარები, როდესაც ღარიბაშვილის მუქარაზე საუბრობენ.