ისნის საოლქო კომისიასთან, სადაც საჩივრების ოქმების განხილვა მიმდინარეობს, ხმაურია. ადგილზე შეკრებილი ოპოზიციის წარმომადგენლები და აქტივისტები ბიულეტენების გადათვლას ითხოვენ.

ისინი მე-16 და 26-ე უბნის ბიულეტენების გადათვლას ითხოვენ. მათი თქმით, აღნიშნულ საარჩევნო უბნებზე ბიულეტენები მეტი რაოდენობითაა და ოქმებში დისბალანსია.

ლელო საქართველოსთვის მაჟორიტარობის კანდიდატი, ისნის რაიონში, ლანა გალდავა აცხადებს, რომ ისინი მეტობის ბიულეტენებს აპროტესტებენ და მათ მტკიცებულებები აქვთ, თუ როგორ იყრებოდა თითოეულ უბანზე ათობით მეტი ბიულეტენი.

"ვაპროტესტებთ კონკრეტულად ამ შემთხვევაში მეტობის ბიულეტენებს და ეს ბიულეტენები არის თითოეულ უბანზე ათობით. ლაპარაკი აღარ არის უკვე ნაკლებობაზე ბიულეტენების, აქ უკვე საუბარი არის და მტკიცებულებები გვაქვს მოტანილი, როგორ იყრებოდა თითოეულ უბანზე ათობით მეტი ბიულეტენი, რომელიც აბსოლუტურად სხვა შედეგს დადებს. არ არის ამ ოლქში გამარჯვებული მათი კანდიდატი და ამიტომ არიან გაგულისებული. ყველაფერი გააკეთეს პოლიციის, სუს-ის და ამავდროულად ე.წ. კრიმინალური სამყაროს ტანდემით, რომ დამარცხებული კანდიდატი გამოეყვანათ გამარჯვებულ კანდიდატად და ამის მტკიცებულებებსაც ვავრცელებდით მთელი დღის განმავლობაში, როგორ მუქარით, შანტაჟით ხდებოდა გაყალბება", — აცხადებს გალდავა.

ნაციონალური მოძრაობის წევრი, გოგა ონიანი ამბობს, რომ ბიულეტენები ხელმოწერებზე ნაკლებია და ამის გადათვლა აუცილებელია.

"ძალიან მარტივი კითხვა არსებობს, როდესაც საჩივარი დაწერილია იმასთან დაკავშირებით, რომ ბიულეტენები არის მეტობით, ანუ დაახლოებით 35 ბიულეტენი არის მეტი და ხელმოწერა არის ნაკლები, როგორ შეიძლება უბრალოდ საღ აზრზე მყოფმა არ გადათვალოს ეს ბიულეტენები და არ გადათვალოს ხელმოწერები. ამის გადათვლაზე თქვეს უარი. ანუ მათივე ოქმებით ბიულეტენები არის მეტი, ვიდრე ხელმოწერები ჟურნალში, ამ დროს, ვინც არ უნდა იყოს, სულ რომ არ იცოდეს იურისპრუდენცია, სულ რომ არ იცოდეს სამართალი, უბრალოდ, ლოგიკა გვკარნახობს, რომ ამ შემთხვევაში უნდა გადაითვალო თავიდან ხელმოწერები, ბიულეტენები და თუ მართლაც აღმოჩნდა მეტობა, მეტობა იმ რაოდენობით, რომელიც ზეგავლენას ახდენს შედეგზე, აუცილებლად უნდა გაბათილდეს ეს უბანი. რომ არ გაბათილებულიყო უბანი, უბრალოდ თქვეს, რომ არ ვხსნით ყუთებს, არ ვხსნით ბიულეტენებს და არ ვაპირებთ გადათვლას", — ამბობს ის.

სხდომას ესწრებოდა, ასევე, პარტია დროას წარმომადგენელი, თაკო კაკაბაძე, რომელიც ამბობდა, რომ წინა შემთხვევაში გადათვლის შედეგად აღმოჩნდა, რომ 0-ის ნაცვლად 18 ხმა ჰქონდათ. კაკაბაძე სხდომიდან გააძევეს.

გაიგე მეტი:

• გადათვლის შედეგად აღმოჩნდა, რომ უბანზე, სადაც გვეწერა 0 ხმა, გვქონია 20 — ხოშტარია

2 ოქტომბერს საქართველოში ადგილობრივი თვითმმართველობის არჩევნები გაიმართა. მოსახლეობა მერებსა და საკრებულოების წევრებს ირჩევდა. თუმცა, ამჯერად ეს არ არის მხოლოდ თვითმმართველობის არჩევნები — მიუხედავად იმისა, რომ ქართულმა ოცნებამ შარლ მიშელის შეთანხმება ანულირებულად გამოაცხადა, ოპოზიცია ამ არჩევნებს რეფერენდუმს უწოდებს. სწორედ ამ დოკუმენტის მიხედვით, იმ შემთხვევაში, თუ ქართული ოცნება თვითმმართველობის არჩევნებზე 43%-ზე ნაკლებს აიღებდა, რიგგარეშე არჩევნები უნდა ჩატარებულიყო.