საქართველოს პარლამენტის თავმჯდომარემ, კახა კუჭავამ უკრაინაში ოფიციალური ვიზიტისას განაცხადა, რომ მიხეილ სააკაშვილი ამ ორ ქვეყანას შორის განხეთქილების საბაბი ვერ გახდება.

"ბუნებრივია, რომ ამ საკითხსაც შევეხებით და ვისაუბრებთ, მაგრამ არანაირ ექსტრადაციაზე საუბარი არ იქნება, მით უმეტეს, ჩემი მხრიდან. ამაზე შესაბამისად უწყებები ითანამშრომლებენ, თუმცა ჩვენ ძალიან კარგად ვიცით, რომ ვსაუბრობთ მსჯავრდებულს, რომელმაც, ძველი საქმეები რომ გვერძე გადავდოთ, პირდაპირ დაარღვია კანონი, როგორც ერთი ქვეყნის, ისე მეორე ქვეყნის საზღვრის უკანონო კვეთასთან დაკავშირებით, ამიტომ ზედმეტია იმაზე საუბარი, ვერც იქნება საუბარი პოლიტპატიმრობაზე, ან ა.შ.

ჩვენ ვართ ორი მოძმე ერი, სტრატეგიული პარტნიორები, ჩვენ გვაქვს ძალიან ბევრი გეგმა თანამშრომლობის კუთხით და ბევრი სხვა, რა თქმა უნდა, როგორც ოკუპირებული ტერიტორიები, საერთო მტერი და ბევრი სხვა მიზეზი. ვერ გახდება ერთი ადამიანი ამ ორ ქვეყანას შორის განხეთქილების საბაბი", — ამბობს პარლამენტის თავმჯდომარე.

პარლამენტის თავმჯდომარე, კახა კუჭავა ოფიციალური ვიზიტით უკრაინაში გაემგზავრა. პარლამენტის პრესსამსახურის ინფორმაციით, კუჭავა უკრაინაში ჰოლოკოსტის ყველაზე მძიმე გამოვლინების მსხვერპლთა ხსოვნისადმი პატივის მიგების ცერემონიაში მიიღებს მონაწილეობას.

კულტურის მინისტრმა, თეა წულუკიანმა 4 ოქტომბერს განაცხადა, რომ ხელისუფლებას არანაირი სურვილი არ აქვს, ექსპრეზიდენტი, მიხეილ სააკაშვილი უკრაინას გადასცეს. მისი განმარტებით, ექსტრადიციაზე საუბარი სამართლებრივი უაზრობა და ნონსენსია, რადგან სააკაშვილი უკრაინაში სისხლის სამართლებრივ პასუხისგებაში მიცემული არ არის, ამიტომ ექსპრეზიდენტი სასჯელს "ქართულ მიწაზე" მოიხდის.

27 სექტემბერს ექსპრეზიდენტმა სააკაშვილმა ფეისბუქზე გამოაქვეყნა ბილეთების ფოტო, რომლის მიხედვითაც ქვეყანაში 2 ოქტომბერს, ხმის მიცემის პროცედურის დასრულების შემდეგ უნდა დაბრუნებულიყო. მმართველ გუნდში ამბობდნენ, რომ ის სიტყვას ისევ უღალატებდა და ჩამოსვლას ვერ გაბედავდა, მაგრამ თუ მაინც გაბედავდა, აეროპორტშივე დააკავებდნენ. თუმცა, არჩევნების წინა დღეს, პირველ ოქტომბერს, სააკაშვილმა დაპოსტა, რომ საქართველოში იმყოფებოდა. რამდენიმე საათში მან ორი ვიდეოც გაავრცელა, რომელშიც ამბობდა, რომ ბათუმშია და აქტიურად აპირებს ბრძოლას.

სანამ სააკაშვილი მხარდამჭერებს მობილიზაციისკენ მოუწოდებდა, ქართულ ოცნებაში ამტკიცებდნენ, რომ ის არათუ ქვეყანაში შემოვიდა, უკრაინაში იყო. იმავეს ამბობდა შინაგან საქმეთა სამინისტროც და ამტკიცებდა, რომ მას არც უკრაინის და არც საქართველოს საზღვრები არ გადაუკვეთავს. ამ განცხადებებიდან რამდენიმე საათში პრემიერმინისტრმა, ირაკლი ღარიბაშვილმა შინაგან საქმეთა მინისტრთან და სახელმწიფო უსაფრთხოების სამსახურის ხელმძღვანელთან ერთად ბრიფინგი გამართა, სადაც თქვა, რომ სააკაშვილი დაკავებულია და პენიტენციურ დაწესებულებაში გადაიყვანეს. მოგვიანებით, იმედის ეთერში პრემიერმინისტრი ამტკიცებდა, რომ ყველაფერი წინასწარ იცოდნენ და "ოპერატიული ტაქტიკის" გამო უწევდათ საპირისპირო განცხადებების გაკეთება.

გაიგე მეტი: