საგარეო საქმეთა მინისტრი, დავით ზალკალიანი არ გამორიცხავს, რომ ყოფილმა პრეზიდენტმა, მიხეილ სააკაშვილმა არა მხოლოდ საქართველოს, არამედ უკრაინის საზღვარიც უკანონოდ გადაკვეთა. ის, ასევე, ფიქრობს, რომ უკრაინის პრეზიდენტმა, ვოლოდიმირ ზელენსკიმ სააკაშვილის საქართველოში ჩამოსვლის შესახებ, მედიით შეიტყო.

"ალბათ, ყურადღებას მიაქცევდით პრეზიდენტ ზელენსკის განცხადებას, სადაც მან თქვა, რომ მისთვისაც მოულოდნელი იყო და საერთოდ, მანაც, მე მგონი, მედიით შეიტყო მისი უკრაინის დატოვების ფაქტი. ასევე, მე მაქვს ჩემი ვარაუდი, ჩემი პირადი ვარაუდი არის, რომ არ არის გამორიცხული, რომ მას უკრაინის კანონმდებლობაც ჰქონდეს დარღვეული და უკრაინის საზღვარი ჰქონდეს უკანონოდ გადაკვეთილი", — განაცხადა დავით ზალკალიანმა.

რაც შეეხება სააკაშვილის უკრაინაში დაბრუნების შესაძლებლობებს, საგარეო საქმეთა მინისტრი დაეთანხმა კულტურის, სპორტისა და ახალგაზრდობის მინისტრს, თეა წულუკიანს და განაცხადა, რომ ეს არ მოხდება.

"მხოლოდ იმ შემთხვევაში ხდება ექსტრადირება, თუკი მაქვს აქვს იმ ქვეყნის შესაბამისი სისხლის სამართლის დანაშაული ჩადენილი", — განაცხადა ზალკალიანმა.

დავით ზალკალიანის თქმით, გარდა იმისა, რომ უკრაინაში საქართველოს საელჩოს წარმომადგენელის შემდეგ, დღეს უკრაინის საგარეო საქმეთა სამინისტროში ახალი ელჩი, გიორგი ზაქარაშვილი მივა და საჭიროების შემთხვევაში მათ სააკაშვილის შესახებ დამატებით ინფირმაციას მიაწვდის.

"მოგეხსენებათ, რომ ჩენ უკრაინაში ახალი ელჩი გვყავს. ის დღეს, დღის განმავლობაში გადასცემს რწმუნებათა სიგელების ასლებს საგარეო საქმეთა სამინისტროში და კიდევ დამატებით ინფორმაციას, თუკი ასეთი ინფორმაცია აინტერესებთ უკრაინელ პარტნიორებს, აუცილებლად მივაწვდით მათ ამ საქმესთან დაკავშირებით", — ამბობს ზალკალიანი.

27 სექტემბერს ექსპრეზიდენტმა სააკაშვილმა ფეისბუქზე გამოაქვეყნა ბილეთების ფოტო, რომლის მიხედვითაც ქვეყანაში 2 ოქტომბერს, ხმის მიცემის პროცედურის დასრულების შემდეგ უნდა დაბრუნებულიყო. მმართველ გუნდში ამბობდნენ, რომ ის სიტყვას ისევ უღალატებდა და ჩამოსვლას ვერ გაბედავდა, მაგრამ თუ მაინც გაბედავდა, აეროპორტშივე დააკავებდნენ. თუმცა, არჩევნების წინა დღეს, პირველ ოქტომბერს, სააკაშვილმა დაპოსტა, რომ საქართველოში იმყოფებოდა. რამდენიმე საათში მან ორი ვიდეოც გაავრცელა, რომელშიც ამბობდა, რომ ბათუმშია და აქტიურად აპირებს ბრძოლას.

სანამ სააკაშვილი მხარდამჭერებს მობილიზაციისკენ მოუწოდებდა, ქართულ ოცნებაში ამტკიცებდნენ, რომ ის არათუ ქვეყანაში შემოვიდა, უკრაინაში იყო. იმავეს ამბობდა შინაგან საქმეთა სამინისტროც და ამტკიცებდა, რომ მას არც უკრაინის და არც საქართველოს საზღვრები არ გადაუკვეთავს. ამ განცხადებებიდან რამდენიმე საათში პრემიერმინისტრმა, ირაკლი ღარიბაშვილმა შინაგან საქმეთა მინისტრთან და სახელმწიფო უსაფრთხოების სამსახურის ხელმძღვანელთან ერთად ბრიფინგი გამართა, სადაც თქვა, რომ სააკაშვილი დაკავებულია და პენიტენციურ დაწესებულებაში გადაიყვანეს. მოგვიანებით, იმედის ეთერში პრემიერმინისტრი ამტკიცებდა, რომ ყველაფერი წინასწარ იცოდნენ და "ოპერატიული ტაქტიკის" გამო უწევდათ საპირისპირო განცხადებების გაკეთება.

პროკურატურის განცხადებით, საზღვრის უკანონოდ კვეთაზე მის წინააღმდეგ კიდევ ერთი გამოძიება დაიწყო. პრეზიდენტმა კი განაცხადა, რომ ექსპრეზიდენტს არასდროს შეიწყალებს, რადგან მას ქვეყნის წინაშე დანაშაული აქვს ჩადენილი. ექსპრეზიდენტი კი ბრალს არ აღიარებს, თავს პოლიტიკურ პატიმრად მიიჩნევს და შიმშილობას იწყებს.

ვინაიდან სააკაშვილი უკრაინის მოქალაქეა, მისმა პატიმრობამ კითხვები გააჩინა პარტნიორ ქვეყანაშიც. კერძოდ, უკრაინის პრეზიდენტისა და საგარეო საქმეთა სამინისტროს პრესსპიკერებმა დაპოსტეს, რომ ქართული მხარისგან განმარტებებს ელიან. პასუხად საგარეო საქმეთა სამინისტროში თქვეს, რომ საელჩოს დიპლომატი ადგილობრივ უწყებას საჭირო ინფორმაციას მიაწვდის.