კულტურის, სპორტისა და ახალგაზრდობის მინისტრმა, თეა წულუკიანმა მთავარი არხის ჟურნალისტს უთხრა, რომ მან და "მისმა ბელადმა" არჩევნებში განიცადეს კრახი, ამიტომ ემა გოგოხია დაიბრუნებს მიკროფონს, რომელიც თავად წაართვა.

"ქალბატონ ემას შეუძლია ნებისმიერ დროს ეს მიკროფონი ჩემგან წაიღოს ან მე თუ მოვხვდები სამეგრელოში და ალბათ მოვხვდები, ვინაიდან მეორე ტურია, რა თქმა უნდა, შეძლებს ის თავისი მიკროფონის დაბრუნებას. იმიტომ, რომ თქვენ, ემა გოგოხიამ და თქვენმა ბელადმა, რომელიც ციხიდან გესაუბრებათ, განიცადეთ პოლიტიკური კრახი", — უთხრა წულუკიანმა მთავარი არის ჟურნალისტს.

მთავარი არხის ჟურნალისტს, ემა გოგოხიას თეა წულუკიანმა მიკროფონი 22 ივლისს, სენაკის თეატრში წაართვა და შეურაცხყოფა მიაყენა. უხეშად წართმევის შემდეგ, მინისტრმა მთავარი არხის მიკროფონით დაიწყო საუბარი და ბიძინა ივანიშვილს მადლობა გადაუხადა. წულუკიანი ჟურნალისტს უთხრა: "ემა, მოდი, აბა თქვი, ბიძინას გაუმარ...". მანვე Facebook-ზე გამოაქვეყნა ფოტო და დაწერა, რომ ამიერიდან გაკეთებული საქმეების შესახებ ამ მიკროფონით უნდა "გვაუწყოს". მინისტრის აზრით, ამ საქციელით ჟურნალისტი განაიარაღა.

აღსანიშნავია, რომ მთავარი არხის ჟურნალისტმა პოლიცია იქვე გამოიძახა. როგორც გოგოხიამ თქვა, საპატრულო პოლიციის თანამშრომლებმა უთხრეს, რომ საქმე არა მათი, არამედ კრიმინალური პოლიციის კომპეტენცია იყო, დაემშვიდობნენ და წავიდნენ. ამ ფაქტს სცენიდან გამოეხმაურა წულუკიანი, რომელსაც ხელში ისევ მთავარი არხის მიკროფონი ეჭირა და განაცხადა, რომ "ვიღაცები" ტყუილად გამოიძახეს.

On.ge კვირების განმავლობაში ცდილობდა გაერკვია, დაიწყო თუ არა ამ საქმეზე გამოძიება, თუმცა შინაგან საქმეთა სამინისტროში მუდმივად გვპასუხობდნენ, რომ ამის შესახებ ინფორმაცია არ ჰქონდათ. ამ ქმედებაზე კითხვა დაუსვეს შინაგან საქმეთა მინისტრსაც. ვახტანგ გომელაურმა თქვა, რომ ინფორმაცია ახლა მიიღო და აუცილებლად გაერკვევა, რის შემდეგაც რამდენიმე დღე გავიდა.

მთავარმა არხმა პროკურატურასაც მიმართა. ნიკა გვარამიას თქმით, ეს არის ძალიან სახიფათო და პირდაპირი სიგნალი, რომ მედიაზე ძალადობრივი ზემოქმედების ახალი ტალღა იწყება.

საქართველოს ახალგაზრდა იურისტთა ასოციაციის თავმჯდომარე On.ge-სთან განმარტავს, რომ კულტურის მინისტრის ქმედება სისხლის სამართლის კოდექსის 154-ე მუხლით გათვალისწინებულ დანაშაულის ნიშნებს შესაძლოა შეიცავდეს. ეს მუხლი ჟურნალისტურ საქმიანობაში უკანონო ხელის შეშლას გულისხმობს. ამასთან, ნიკა სიმონიშვილის განცხადებით, თუ წულუკიანი მიკროფონის დაბრუნებას არ აპირებს, გამოძიების დაწყება საკუთრების წინააღმდეგ მიმართული დანაშულისთვისაც შესაძლებელია.

თეა წულუკიანი ემა გოგოხიას სვანეთში ეპატიჟებოდა და ამბობდა, რომ მიკროფონს სწორედ იქ დაუბრუნებდა. საბოლოოდ, თეა წულუკიანმა თქვა, რომ მთავარი არხის კუთვნილ მიკროფონს 2 ოქტომრბის არჩევნებში გამარჯვების შემდეგ დააბრუნებდა.

გაიგე მეტი:

• მმართველი პარტიის წევრების მსგავსი ქმედებები ახალისებს ძალადობას ჟურნალისტების მიმართ — ქარტია წულუკიანის მიერ მიკროფონის წართმევაზე