ცენტრალური საარჩევნო კომისიის (ცესკო) მიხედვით, 2021 წლის თვითმმართველობის არჩევნებზე აქტივობამ ამომრჩეველთა 51,92% შეადგინა. საარჩევნო უბნებზე სულ 1 815 776 ადამიანი მივიდა.

შედარებისთვის, წინა, 2017 წლის თვითმმართველობის არჩევნებზე აქტივობა 45,64% იყო, ხოლო 2020 წლის საპარლამენტო არჩევნებზე — 56,11%.

ცესკოს ინფორმაციით, დღის განმავლობაში საარჩევნო ადმინისტრაციაში 366 საჩივარი შევიდა და უმრავლესობა პროცედურულ საკითხს შეეხება.

დღეს საქართველოში ადგილობრივი თვითმმართველობის არჩევნები მიმდინარეობს. მოსახლეობა მერებსა და საკრებულოების წევრებს ირჩევს. თუმცა საზოგადოების ნაწილისთვის ეს არ არის მხოლოდ თვითმმართველობის არჩევნები — მიუხედავად იმისა, რომ ქართულმა ოცნებამ შარლ მიშელის შეთანხმება ანულირებულად გამოაცხადა, ოპოზიცია ამ არჩევნებს რეფერენდუმს უწოდებს. სწორედ ამ დოკუმენტის მიხედვით, იმ შემთხვევაში, თუ ქართული ოცნება თვითმმართველობის არჩევნებზე 43%-ზე ნაკლებს აიღებდა, რიგგარეშე არჩევნები უნდა ჩატარებულიყო. ხელისუფლება დღეს აცხადებს, რომ ამ პირობის შესრულებას არ აპირებს.