სამოქალაქო საარჩევნო კომისია ინფრასტრუქტურისა და რეგიონული განვითარების მინისტრის მოადგილეს, კობა გაბუნიას ქუთაისში ამომრჩეველთა მოსყიდვაში ადანაშაულებს. ორგანიზაცია ავრცელებს ფოტოებს, სადაც, მათი თქმით, მოსყიდვის ფაქტებია აღბეჭდილი.

"ქუთაისის ოლქის 95-ე უბანთან ღიად ხდება ფულის დარიგება და ამომრჩევლის მოსყიდვა. მოსყიდვის პროცესში უშუალოდ ჩართულია ინფრასტრუქტურის მინისტრის მოადგილე", — აცხადებენ სამოქალაქო საარჩევნო კომისიაში.

ფოტო: სამოქალაქო საარჩევნო კომისია

On.ge ინფრასტრუქტურის სამინისტროს დაუკავშირდა, სადაც ამბობენ, რომ გაბუნია მხოლოდ ერთი ფოტოს ნამდვილობას ადასტურებს, თუმცა მოსყიდვის ფაქტს უარყოფს.

"როგორც თვითონ [კობა გაბუნიამ] განაცხადა, ერთ-ერთ ფოტოზე, სადაც ის არის მამასთან ერთად აღბეჭდილი, თავისი სახლის წინ და დანარჩენ ფოტოზე, ცილისწამება არისო, ამბობს. მოსყიდვას, რა თქმა უნდა უარყოფს", — აცხადებენ ინფრასტრუქტურის სამინისტროს პრესსამსახურში.

დღეს საქართველოში ადგილობრივი თვითმმართველობის არჩევნები მიმდინარეობს. მოსახლეობა მერებსა და საკრებულოების წევრებს ირჩევს. თუმცა საზოგადოების ნაწილისთვის ეს არ არის მხოლოდ თვითმმართველობის არჩევნები — მიუხედავად იმისა, რომ ქართულმა ოცნებამ შარლ მიშელის შეთანხმება ანულირებულად გამოაცხადა, ოპოზიცია ამ არჩევნებს რეფერენდუმს უწოდებს. სწორედ ამ დოკუმენტის მიხედვით, იმ შემთხვევაში, თუ ქართული ოცნება თვითმმართველობის არჩევნებზე 43%-ზე ნაკლებს აიღებდა, რიგგარეშე არჩევნები უნდა ჩატარებულიყო. ხელისუფლება დღეს აცხადებს, რომ ამ პირობის შესრულებას არ აპირებს.

გაიგე მეტი: