თითქმის 20-22 წლის წინ, ქართული ტელეეკრანი მთლიანად რუსულად დუბლირებულ ფილმებს ჰქონდათ ოკუპირებული. ამერიკელი, ბრაზილიელი, მექსიკელი, თუ სხვა ქვეყნის მსახიობები, მაყურებელს არამშობლიურ ენაზე ესაუბრებოდნენ.

იმ დროს ტელეკომპანია რუსთავი 2 ახლადშექმნილი ტელევიზია იყო პოსტსაბჭოთა საქართველოში და სხვა მრავალ სიახლესთან ერთად, მაყურებელს ქართულად გახმოვანებულ ფილმებსა და სერიალებს სთავაზობდა.

ამ საქმის ერთ-ერთი პიონერი კი დღეს უკვე ქართველებისთვის ერთ-ერთი ყველაზე ცნობილი მსახიობი, ყველასთვის საყვარელი ნატო გაგნიძე იყო: ქალი, რომელმაც ქართული გახმოვანება სხვა საფეხურზე აიყვანა.

ჩვენს მკითხველს დღეს სწორედ მასთან ინტერვიუს შევთავაზებთ, სადაც ნატო მის პროფესიულ არჩევანსა და სუპერ პოპულარული ქართული სერიალის, "ტიფლისის" კადრს მიღმა ამბებს მოგვიყვება.

ნატო, არც ისე დიდი ხნის წინ ქართველმა მაყურებელმა მაყურებელმა პირველად მოისმინა თქვენი ხმა ეკრანიდან და მაშინვე შეიყვარა. გაიხსენეთ თქვენი პირველი ნაბიჯები 1998 წელს, როდესაც მსახიობმა ქალმა გადაწყვიტა გახმოვანების სტუდიაში შეედგა ფეხი.

ჩემი თაობა მოესწრო იმ დროს, როდესაც ქართულ ეკრანებზე ჩვენს საყვარელ პერსონაჟებს რუსული გახმოვანებით ვუსმენდით. ბევრს ეს არ მოსწონდა, მათ შორის იყო მაშინ ახლად დაარსებული ტელეკომპანია, რუსთავი 2, რომელმაც გადაწყვიტა ამ კუთხით დიდი ცვლილებები განეხორციელებინა და გახმოვანების მსახიობზე კონკურსი გამოაცხადა. მე მაშინ მესამე კურსის სტუდენტი ვიყავი და რადგან კონკურსს არ ჰქონდა ასაკობრივი შეზღუდვა, კონკურსში მონაწილეობის მიღება გადავწყვიტე. ამავე კონკურსში მონაწილეობა მიიღო ქართული თეატრისა და კინოს თითქმის ყველა მსახიობმა და ასევე, თეატრალური უნივერსიტეტის სტუდენტებმა. მიუხედავად იმისა, რომ კონკურენცია მართლა ძალიან დიდი იყო, მე იმ ოთხეულში მოვხვდი, რომელიც ტელევიზიამ შეარჩია, თან მხოლოდ მე ვიყავი სტუდენტი, სხვა დანარჩენი შერჩეული კანდიდატები უკვე გამოცდილი და შემდგარი მსახიობები იყვნენ.

წარმომიდგენია, როგორი ბედნიერი და გახარებული იყავით ამ ფაქტით

რა თქმა უნდა, ჩემთვის, სტუდენტისთვის, ამ კონკურსში გამარჯვება ძალიან მნიშვნელოვანი იყო, თუმცა ამავდროულად უდიდესი პასუხისმგებლობაც, რადგან მე ვიყავი იმ ადამიანებს შორის, ვისაც მოუწია ქართული გახმოვანების სტილი და სპეციფიკა შეექმნა.

მთავარ სირთულეს რა წარმოდგენდა მაშინ?

გარდა იმისა, რომ ყველაფერს ნულიდან ვიწყებდით, რთული იყო ისიც, რომ მაყურებელს, რომელიც შეჩვეული იყო რუსულ გახმოვანებას, უცებ ამ შეიძლება ითქვას წესის შეცვლას ვთხოვდით და უხეშად რომ ვთქვათ "ვაიძულებდით" მათი საყვარელი პერსონაჟები უკვე ქართულად ალაპარაკებულები შეეყვარებინა. ვიცოდით, რომ ამას გარკვეული პროტესტი მოყვებოდა, თუმცა ჩვენმა მონდომებამ ქართველებს მალევე დაავიწყა სხვა გახმოვანება და მოთხოვნა ამ მიმართულებით გაიზარდა. თანდათან ვითარდებოდა ეს მიმართულება, იხვეწებოდა და უფრო მრავალფეროვანი ხდებოდა, აკმაყოფილებდა მაღალპროფესიულ სტანდარტებსაც და შესაბამისად, სხვა კომპანიებმაც დაიწყეს მაყურებლისთვის ქართული გახმოვანების შეთავაზება.

შემდეგ როგორ გაიზარდა გუნდი?

ის, რომ გუნდი სწორად მუშაობდა და ხარისხიან პროდუქტს სთავაზობდა მაყურებელს, ძალიან მალე გახდა ცხადი, რადგან მაყურებლების მხრიდან გაიზარდა მოთხოვნა ქართულად გახმოვანებულ სერიალებსა და ფილმებზე. ამის გამო კომპანიას დასჭირდა ახალი კადრები, რომელთა შერჩევაში და შემოქმედებითად მომზადებაში უშუალოდ მეც ვმონაწილეობდი და ახალ გუნდთან ერთად კიდევ უფრო მეტი ქართულად გახმოვანებული სერიალი და ფილმი შევთავაზეთ მაყურებელს.

შემოქმედებითი ჯგუფის ინიციატივით მაყურებელმა არათუ ქართულად გახმოვანებული, სრულად დუბლირებული სერიალიც კი იხილა…

ბევრს ჰგონია, რომ როდესაც ფილმს, სერიალს, რეკლამას, არ აქვს მნიშვნელობა რას, რამეს ახმოვანებ, მორჩა, ეგ არის… იმის იქით ვერაფერს ვეღარ იზამ… თუმცა, ასე არ არის, ამ სფეროშიც, ისევე როგორც ყველგან, მნიშვნელოვანია მუდმივ განვითარებაზე ფიქრი. შესაბამისად, შემდეგი ეტაპი იყო სრული დუბლირება. ეს ახალი გამოწვევა იყო კომპანიისთვისაც და გუნდისთვის, მაგრამ წარმატებულად გავუმკლავდით და პირველი, სრულად დუბლირებული სერიალი სასოწარკვეთილი დიასახლისები შევთავაზეთ მაყურებელს.

გარდა იმისა, რომ თქვენ მაყურებლებს სხვადასხვა სერიალის პერსონაჟებს აყვარებდით, მალევე გახდით, შეიძლება ითქვას ქართული გახმოვანების პირველი ლედი…. თქვენ მოგანდეს ოსკარის, ოქროს გლობუსის და სხვა მსოფლიოს მთავარი დაჯილდოებების გახმოვანება. ამის გარდა კი გახდით წამყვანი მსახიობების ე.წ. ქართული ხმა, თანაც ეს ყველაფერი მაყურებლის მოთხოვნით.

ხო, ეს ჩემთვისაც უცნაური იყო, როდესაც ტელევიზიაში მისვლისას მეუბნებოდნენ, რომ საჩუქარი ან წერილი გამომიგზავნეს, სადაც ეწერა რომ ესა თუ ის მსახიობი ჩემმა ხმამ შეაყვარა, რომ რომელიღაც სერიალის ყურება მხოლოდ იმიტომ დაიწყეს, რომ ჩემი ხმა მოეწონათ და ა.შ. საბოლოოდ კი მაყურებლის დამსახურებით, აღმოჩნდა ისე, რომ მერილ სტრიპი, ჯულია რობერტსი, ანჯელინა ჯოლი თუ სხვა მსახიობები, ქართულად მხოლოდ ჩემი ხმით საუბრობდნენ და გულწრფელი რომ ვიყო, ეს ჩემთვის დიდი პატივიც არის და ძალიან მიხარია.

საბოლოოდ, გამოვიდა ისე, რომ თქვენ ხართ ხმა, რომელიც მაყურებელმა “ერთი მოსმენით შეიყვარა” და ეს სრულიად ბუნებრივიც იყო. ყველა ერთხმად აღიარებს, რომ არ არსებობს იმაზე ახლობელი ხმა, როგორიც თქვენ გაქვთ. თუმცა, მინდა, რომ ქართულ სერიალს “ტიფლისსაც” შევეხოთ.

მიუხედავად იმისა, რომ გახმოვანება ძალიან საინტერესო პროცესია და ფაქტობრივად შენც თამაშობ იმ მსახიობთან ერთად, ვისაც ქართულად ალაპარაკებ, პირველ რიგში მაინც მსახიობი ვარ და ჩემთვის ეს მაინც მთავარი საქმეა. სამწუხაროდ, ძალიან სამწუხაროდ, საქართველოში განებივრებულები არ ვართ გადაღებებით. თუმცა, პატარ-პატარა გამონათებები აქაც არის ხოლმე. ტელეკომპანია GDS-ში როდესაც მივედი, გახმოვანებასთან ერთად რეჟისორმა ლევან დაბრუნდაშვილმა დაიწყო ახალ სერიალზე, ტიფლისზე მუშაობა და როლი შემომთავაზა.

ეს არ იყო უბრალოდ როლი, თქვენი პერსონაჟი, ქეთევან ორბელიანი, “ტიფლისის” წამყვან პერსონაჟად იქცა… თქვენი პროფესიონალიზმი, რომელიც მანამდეც ცნობილი იყო სხვა სერიალებიდან, “ტიფლისში” კიდევ უფრო მეტად იგრძნობოდა. ქეთევანი არ იყო მხოლოდ პერსონაჟი, ის პირველი ქართველი ფემინისტი ქალი პერსონაჟი იყო და ამით შეიძლება ითქვას, ისტორიული მისიაც კი დაგეკისრათ…

ქეთევან ორბელიანი ნამდვილად არის ჩემი ერთ-ერთი საყვარელი პერსონაჟი. ამ როლზე მუშაობა ჩემთვის ორმაგად საპასუხისმგებლო იყო, იმიტომ რომ ვთამაშობდი ასეთ ქალს, ასეთ სერიალში და ქართველებისთვის ასეთ საყვარელ სერიალში, რომელმაც უდიდესი წარმატება მოიპოვა. ისტორიული პერსონაჟის განსახიერება ურთულესია, უამრავი დეტალის გათვალისწინება გიწევს, მით უმეტეს, როცა ამას ემატება შენი პერსონაჟის მხრიდან იმ თემებზე საუბარიც, რომელზეც სამწუხაროდ ქართველები უხეშად რეაგირებენ და ყველას, ვინც ფემინისტურ იდეებს აჟღერებს, ღია სივრცესა თუ სოციალურ ქსელებში, ბულინგის მსხვერპლად აქცევენ. ვერ ვიტყვი, რომ ამან რამე დაბრკოლება შემიქმნა, ქალთა უფლებებზე, ძალადობაზე, თანასწორობაზე და ა.შ. ისედაც ყოველთვის ღიად ვსაუბრობდი და არასდროს მიფიქრია, რომ ვინმესთვის ამ კუთხით ანგარიში უნდა გამეწია.

აუცილებლად უნდა გკითხოთ სამომავლო გეგმებზეც… რას აპირებს ნატო გაგნიძე, ყველაზე პოპულარული ხმა საქართველოში?

ახლა აქტიურად მიდის გადაღება, ასევე გახმოვანება უკვე ორ სატელევიზიო არხზე, რუსთავი 2 და GDS. ასევე კინოთეატრებისთვის ფილმების დუბლირება... კიდევ იგეგმება ახალი ქართული სატელევიზიო სერიალის გადაღება. სადაც უკვე შემომთავაზეს მონაწილეობა. და ასევე არის კიდევ ერთი შემოთავაზება. რომელიც ჩემთვის ვფიქრობ ახალი გამოწვევაა და ახალი სატელევიზიო სეზონიდან ალბათ ამ მიმართულებითაც მოვსინჯავ ძალებს.