დეპუტატი იაგო ხვიჩია ექსპრეზიდენტ მიხეილ სააკაშვილს მოუწოდებს, გადაცვალოს ბილეთი და საქართველოში დაგეგმილზე ადრე ჩამოვიდეს. ის ფიქრობს, რომ სააკაშვილი 2 ოქტომბრის არჩევნების დასრულების შემდეგ კი არა, კენჭისყრის განმავლობაში უნდა იყოს ქვეყანაში.

"ეს ერთადერთი შემთხვევაა, რაც მახსენდება ჩემ პოლიტიკურ კარიერაში, როდესაც მე არ ვეთანხმები პატივცემულ ევროპარლამენტარებს. მე, პირიქით, მოვუწოდებ მიხეილ სააკაშვილს, გადაცვალოს ბილეთი და უფრო ადრე ჩამოვიდეს, ნაცვლად 11 საათისა, ის აქ უნდა იყოს დილი 12 საათიდან ან, საერთოდ, წინა დღიდან. იქიდან გამომდინარე, რომ ერთხელ და სამუდამოდ დავამთავროთ მიხეილ სააკაშვილით ადამიანების დაშინება", — განაცხადა იაგო ხვიჩიამ.

მიხეილ სააკაშვილის განზრახვა, დაბრუნდეს საქართველოში თვითმმართველობის არჩევნების დღეს ევროპარლამენტარების ნაწილმა უარყოფითად შეაფასა. მაგალითად, მარკეტა გრეგოროვამ განაცხადა, რომ სააკაშვილის დაბრუნებას ქვეყანაში პოზიტიური ეფექტი არ მოჰყვება. იქამდე, ვიოლა ფონ კრამონმა თქვა, რომ ექსპრეზიდენტის ქვეყანაში დაბრუნება არ ემსახურება საქართველოს ინეტერესებს. კრამონს გამოეხმაურა თავად სააკაშვილი და განაცხადა, რომ ამორალურია, მოუწოდო ვინმეს, არ დაბრუნდეს თავის ქვეყანაში.

მიხეილ სააკაშვილმა 27 სექტემბერს სოციალურ ქსელში გამოაქვეყნა კიევი-თბილისის თვითმფრინავის ბილეთი, რომლის მიხედვითაც 2 ოქტომბერს, დედასთან, გიული ალასანიასთან ერთად საქართველოში ჩამოფრინდება.

გაიგე მეტი: