საიას განცხადებით, ირაკლი ღარიბაშვილის მიერ პარტიულ ღონისძიებებზე ქართული ოცნების თავმჯდომარის, ბიძინა ივანიშვილის როლზე ხაზგასმა პარტიასა და სახელწიფოს ზღვრის გავლებას ართულებს, რაც ეუთოს 1990 წლის კოპენჰაგენის დოკუმენტის მოთხოვნას ეწინააღმდეგება. ამის შესახებ 2021 წლის ადგილობრივი თვითმმართველობის არჩევნების გრძელვადიანი სადამკვირვებლო მისიის მე-2 შუალედურ ანგარიშში ვკითხულობთ.

"გამომწვევად რჩება სამთავრობო პროექტების პერსოფიცინირება და კონკრეტულ პარტიასთან აფილირება. წინასაარჩევნო კამპანიის პერიოდში მთავრობის მეთაური ირაკლი ღარიბაშვილი პარტიული ღონისძიებების დროს სახელისუფლებო ინიციატივებსა და პროექტებზე საუბრისას მუდმივად ხაზგასმით მიუთითებდა პარტია ქართული ოცნების დამფუძნებლისა და ლიდერის, ბიძინა ივანიშვილის როლზე, ასევე მის ფინანსურ წვლილზე", — ვკითხულობთ ანგარიშში.

ამასთან, საიას ცნობით, თიანეთის ოფიციალურ Facebook გვერდზე გამოქვეყნდა პოსტი, მირზა გელოვანის სახლ–მუზეუმში პრემიერმინისტრის ვიზიტის შესახებ, სადაც აღნიშნული პროექტის განხორციელებაში ბიძინა ივანიშვილის ინიციატივა და ფინანსური მხარდაჭერაა აღნიშნული.

ფოტო: საია

"ბიძინა ივანიშვილი პარტია ქართული ოცნების დამფუძნებელი და ლიდერია, ხოლო, ფონდი ქართუ მის დაქვემდებარებაში მოქმედი ორგანიზაცია. კამპანიის ფარგლებში გამართულ ღონისძიებებზე ბიძინა ივანიშვილის მიერ დაფინანსებული პროექტების ტირაჟირება ამომრჩევლისთვის ართულებს სახელმწიფოსა და მმართველ პარტიას შორის ზღვრის გავლებას", — წერია ანგარიშში.

გარდა ამისა, აქვე აღრიცხულია მმართველი პარტიის მერობის კანდიდატების წარდგენისას, მათ მიერ ბიძინა ივანიშვილის როლსა ფინანსურ წვლილზე საუბრის რამდენიმე მაგალითი.

წინასაარჩევნო პროცესებს საია, გრძელვადიანი სადამკვირვებლო მისიის ფარგლებში, 9 რეგიონული ოფისის მეშვეობით თითქმის მთელს საქართველოში აკვირდება. ანგარიში 3 აგვისტოდან 24 სექტემბრის ჩათვლით განხორციელებული მონიტორინგის შედეგებს ფარავს.