ნაციონალური მოძრაობის წევრის, ნუგზარ წიკლაურის განცხადებით, ხელისუფლებამ, შესაძლოა, ექსპრეზიდენტი მიხეილ სააკაშვილი ჩამოსვლის შემთხვევაში დააკავოს, თუმცა, მისი თქმით, პოლიტიკოსები ციხეში წასვლისთვისაც მზად უნდა იყვნენ.

"თუ დააკავებენ, ასეთია ეს საქმე, ასეთია ჩვენი პოლიტიკური ცხოვრება. ჩვენს საზოგადოებაში ბევრს მიაჩნია, რომ პოლიტიკოსები უზრუნველი ცხოვრებით ცხოვრობენ [...] პოლიტიკოსები მზად უნდა იყვნენ მათ შორის იმისთვისაც, რომ თუ ასეთი ვითარება არის, წავიდნენ ციხეებშიც და ამით კიდევ უფრო დააჩქარონ ფარდის ახდის პროცესი ამ მთავრობის მოქმედებებისთვის", — ამბობს წიკალური რადიო თავისუფლებასთან.

წიკლაური, ასევე, აღნიშნავს, რომ სააკაშვილის საქართველოში ჩამოსვლა ქვეყანაში სამართლიანობისა და დემოკრატიის მიმართ რწმენის განმტკიცებას დაეხმარება.

"მიხეილ სააკაშვილი არის ძალიან გავლენიანი პოლიტიკური ფიგურა, ალბათ, ცოტა მაგალითია ჩვენს ისტორიაში, ისევე როგორც სხვა ქვეყნების ისტორიაშიც, რომ ადამიანი, რომელიც 9 წლის განმავლობაში არ არის თავის ქვეყანაში, ფლობდეს ასეთ მხარდაჭერას, და მისი პარტია იყოს მთავარი ოპოზიციური პოლიტიკური პარტია", — აცხადებს წიკლაური.

27 სექტემბერს ექსპრეზიდენტმა, მიხეილ სააკაშვილმა თვითმფრინავის ბილეთი გამოაქვეყნა, რომლის მიხედვითაც 2 ოქტომბერს ჩამოფრინდება. ბილეთის მიხედვით, ის საქართვლოში დედასთან, გიული ალასანიასთან ერთად ჩამოვა.

6 სექტემბერს სააკაშვილმა საკუთარი გეგმების შესახებ ისაუბრა და საქართველოში ჩამოსვლა კვლავ დააანონსა. ეს პირველი შემთხვევა არ ყოფილა, როდესაც სააკაშვილი საქართველოში დაბრუნებაზე საუბრობდა. იმავეს ამბობდა ის წინა არჩევნების პერიოდშიც და ეს რამდენჯერმე თქვა ახლაც. მისი თქმით, პირობას შეასრულებდა და "რეფერენდუმის" წინ საქართველოში ჩამოვიდოდა. სააკაშვილის ჩამოსვლასთან დაკავშირებით განცხადებებზე საუბრისას მმართველ პარტიას არაერთხელ უთქვამს, რომ მას ქვეყანაში შემოსვლის შემთხვევაში დააკავებენ. მიხეილ სააკაშვილის მიმართ არაერთი გამამტყუნებელი განაჩენი არსებობს საქართველოში.

საქართველოში თვითმმართველობის არჩევნები 2 ოქტომბერს იქნება. მას ოპოზიცია რეფერენდუმს უწოდებს და აცხადებს, რომ თუ ქართული ოცნება 43%-ს ვერ აიღებს, რიგგარეშე არჩევნები ჩატარდება. აღნიშნულს არ ეთანხმება მმართველი პარტია, რომელიც 28 ივლისს შეთანხმებიდან გავიდა და დოკუმენტი ანულირებულად გამოაცხადა. პარტიის თავმჯდომარემ, ირაკლი კობახიძემ ეს ოპოზიციას დააბრალა და თქვა, რომ შეთანხმებას მხოლოდ ისინი ასრულებდნენ, რაც არასწორია, ამიტომ დოკუმენტმა თავი ამოწურა.

მიშელის შეთანხმების ერთ-ერთი მთავარი ჩანაწერი კი სწორედ 43%-იანი ბარიერი იყო, რაც იმას ნიშნავდა, რომ თუ ქართულ ოცნებას თვითმმართველობის არჩევნებზე ამაზე ნაკლები შედეგი ექნებოდა, რიგგარეშე არჩევნები უნდა ჩატარებულიყო. ახლა ეს დათქმა აღარ არსებობს.