პარლამენტის დამოუკიდებელი დეპუტატის, სალომე სამადაშვილის თქმით, მიუხედავად იმისა, რომ მიხეილ სააკაშვილი ქართულ პოლიტიკაში ანგარიშგასაწევი ფაქტორია, თვითმმართველობის არჩევნებზე არა კონკრეტული პოლიტიკოსის საქართველოში ჩამოსვლა–არჩამოსვლის საკითხი, არამედ ქვეყნის მომავალი წყდება.

"ვფიქრობ, ის [სააკაშვილი], რა თქმა უნდა, არის ანგარიშგასაწევი ფაქტორი ქართულ პოლიტიკაში, მაგრამ, დიახ, ის არის ერთ–ერთი პოლიტიკოსი და შესაბამისად, 2 ოქტომბერს, ჩემთვის ყოველშემთხვევაში, ბევრად უფრო მნიშვნელოვანი რამ წყდება ამ ქვეყნის მომავლისთვის, ვიდრე რომელიმე კონკრეტული პოლიტიკოსის გეოგრაფიული ადგილმდებარეობა, ან მისი პოლიტიკური მომავალი", — ამბობს სამადაშვილი ფორმულასთან.

მან, ასევე, აღნიშნა, რომ თუ მიხეილ სააკაშვილის დაბრუნება ნაციონალურ მოძრაობას საკუთარი ამომრჩევლის მობილიზებაში ეხმარება, მნიშვნელოვანია, მათ იმის განცდა ჰქონდეთ, რომ ექსპრეზიდენტი ქვეყანაში ამჯერად ნამდვილად ჩამოვა.

27 სექტემბერს ექსპრეზიდენტმა, მიხეილ სააკაშვილმა თვითმფრინავის ბილეთი გამოაქვეყნა, რომლის მიხედვითაც 2 ოქტომბერს ჩამოფრინდება. ბილეთის მიხედვით, ის საქართვლოში დედასთან, გიული ალასანიასთან ერთად ჩამოვა.

6 სექტემბერს სააკაშვილმა საკუთარი გეგმების შესახებ ისაუბრა და საქართველოში ჩამოსვლა კვლავ დააანონსა. ეს პირველი შემთხვევა არ ყოფილა, როდესაც სააკაშვილი საქართველოში დაბრუნებაზე საუბრობდა. იმავეს ამბობდა ის წინა არჩევნების პერიოდშიც და ეს რამდენჯერმე თქვა ახლაც. მისი თქმით, პირობას შეასრულებდა და "რეფერენდუმის" წინ საქართველოში ჩამოვიდოდა. სააკაშვილის ჩამოსვლასთან დაკავშირებით განცხადებებზე საუბრისას მმართველ პარტიას არაერთხელ უთქვამს, რომ მას ქვეყანაში შემოსვლის შემთხვევაში დააკავებენ. მიხეილ სააკაშვილის მიმართ არაერთი გამამტყუნებელი განაჩენი არსებობს საქართველოში.

საქართველოში თვითმმართველობის არჩევნები 2 ოქტომბერს იქნება. მას ოპოზიცია რეფერენდუმს უწოდებს და აცხადებს, რომ თუ ქართული ოცნება 43%-ს ვერ აიღებს, რიგგარეშე არჩევნები ჩატარდება. აღნიშნულს არ ეთანხმება მმართველი პარტია, რომელიც 28 ივლისს შეთანხმებიდან გავიდა და დოკუმენტი ანულირებულად გამოაცხადა. პარტიის თავმჯდომარემ, ირაკლი კობახიძემ ეს ოპოზიციას დააბრალა და თქვა, რომ შეთანხმებას მხოლოდ ისინი ასრულებდნენ, რაც არასწორია, ამიტომ დოკუმენტმა თავი ამოწურა.

მიშელის შეთანხმების ერთ-ერთი მთავარი ჩანაწერი კი სწორედ 43%-იანი ბარიერი იყო, რაც იმას ნიშნავდა, რომ თუ ქართულ ოცნებას თვითმმართველობის არჩევნებზე ამაზე ნაკლები შედეგი ექნებოდა, რიგგარეშე არჩევნები უნდა ჩატარებულიყო. ახლა ეს დათქმა აღარ არსებობს.