ნეტფლიქსის ერთ-ერთი ყველაზე პოპულარული სერიალი ბრიჯერტონი მალე მე-2 სეზონით, ახალი პერსონაჟებითა და, რაც მთავარია, ახალი სასიყვარულო ისტორიით დაგვიბრუნდება. ნეტფლიქსმა ცოტა ხნის წინ გაავრცელა პირველი თიზერი, რომელშიც დაფნის ძმას, ენტონისა და ახალ პერსონაჟს — ქეით შარმას ვეცნობით.

სერიალის მეორე სეზონი ჯულია ქვინის ნაწარმოებების ციკლის მეორე წიგნის — ვისკონტი, რომელსაც ვუყვარდი მიხედვით იქნება და ენტონი ბრიჯერტონის სიყვარულის ძიებაზე მოგვიყვება. ახალი პერსონაჟის, ქეით შარმას სიმონ ეშლი განასახიერებს, რომელიც Sex Education-ში რუბის საუკეთესო მეგობრის — ოლივიას როლსაც ასრულებს. აღწერის მიხედვით შარმა "გონებამახვილი, ჭკვიანი ქალია, რომელიც სისულელეებს არად აგდებს, მათ შორის არც ენტონი ბრიჯერტონს". ახალ სეზონს 2022 წელს ვიხილავთ.

ფოტო: Netflix

ნეტფლიქსის მიერ გავრცელებულ პირველ ფოტოებში ლედი დენბერისა და ბრიჯერტონების ოჯახსაც ვხედავთ, თუმცა ფოტოებში დაფნი არ ჩანს. გავრცელებული ინფორმაციით, ის სერიალში კვლავ გამოჩნდება, თუმცა მხოლოდ მეორეხარისხოვანი როლი ექნება. ფოტოებში ვერც საიმონ ბასეტს შეამჩნევდით, თუმცა ეს გასაკვირი სულაც არაა, რადგან საიმონის როლის შემსრულებელი რეგე-ჟან პეიჯი მეორე სეზონში აღარ დაბრუნდება.

ფოტო: Netflix

ბრიჯერტონის პირველი სეზონის პრემიერა 2020 წლის დეკემბერში შედგა. სერიალმა მაყურებელთა ყურადღება მალევე მიიპყრო და ნეტფლიქსის ერთ-ერთი ყველაზე წარმატებული პროექტი გახდა.

ამ ეტაპზე ბრიჯერტონის მე-2 სეზონზე მუშაობა მიმდინარეობს. შეგახსენებთ, რომ ნეტფლიქსმა სერიალის მე-3 და მე-4 სეზონებიც დაამტკიცა. აღსანიშნავია, რომ ბრიჯერტონის შემქმნელები დედოფალ შარლოტას შესახებ ახალ სერიალსაც გადაიღებენ.

ამავე თემაზე: