თუ მეჯლისები, თვალისმომჭრელი კოსტიუმები, საოცარი ჰანგები და, რაც მთავარია, სერიალი ბრიჯერტონი მოგენატრათ, თქვენთვის სასიამოვნო სიახლე გვაქვს: ბრიჯერტონის სამყაროს ახალი სერიალი შეემატება, რომელიც დედოფალ შარლოტას ახალგაზრდობაზე მოგვითხრობს.

დედოფალი შარლოტა სერიალის ერთ-ერთი გამორჩეული პერსონაჟია, რომელმაც მაყურებელთა გული მალევე მოიგო. აღსანიშნავია, რომ მასთან ერთად, ბრიჯერტონის სპინოფში ვაიოლეტ ბრიჯერტონსა და ლედი დანბერისაც ვიხილავთ. ახალ სერიალზე შონდა რაიმსი იმუშავებს.

"უამრავ მაყურებელს დედოფალ შარლოტას შესახებ მანამ არაფერი სმენოდა, სანამ ბრიჯერტონმა ის მსოფლიოს არ გააცნო, ამიტომ მიხარია, რომ ახალი სერიალი მისი ისტორიისა და ბრიჯერტონის სამყაროს კიდევ უფრო განავრცობს", — ამბობს ნეტფლიქსის წარმომადგენელი ბელა ბაჯერია.

ბრიჯერტონის პირველი სეზონის პრემიერა 2020 წლის დეკემბერში შედგა. სერიალმა მაყურებელთა ყურადღება მალევე მიიპყრო და ნეტფლიქსის ერთ-ერთი ყველაზე წარმატებული პროექტი გახდა.

ამ ეტაპზე ბრიჯერტონის მე-2 სეზონზე მუშაობა მიმდინარეობს. შეგახსენებთ, რომ ნეტფლიქსმა სერიალის მე-3 და მე-4 სეზონებიც დაამტკიცა. სამწუხაროდ, როგორც ცნობილია, მომდევნო სეზონებში ყველასათვის საყვარელ რეგე-ჟან პეიჯს ვეღარ ვიხილავთ.

ამავე თემაზე: