ამერიკული როკ-ჯგუფ ნირვანას ცნობილი ალბომის, Nevermind-ის გარეკანი ამჯერად არა ყდაზე გამოსახულმა ბავშვმა, არამედ ავსტრალიელმა ველოსიპედისტმა პიტ სტოუკსმა გააცოცხლა. ამისათვის მან ავსტრალიის ქალაქ ადელაიდას ირგვლივ დაახლოებით 150 კმ გაიარა.

ალბომის დასახატად პიტმა GPS-ით მომუშავე აპლიკაცია Strava გამოიყენა. ეს 45 წლის ველოსიპედისტის პირველი ნამუშევარი არაა. მას GPS-ით აქამდე ბეთჰოვენი, დრაკონი, დინოზავრი, მელიაც დაუხატავს.

ბავშვის დახატვას დაახლოებით 8 საათი დასჭირდა, შესვენებების ჩათვლით. პიტმა პატარა მოგზაურობა ნირვანას ცნობილი ალბომის 30 წლის იუბილეს მიუძღვნა

"როცა ეს ალბომი გამოვიდა, სკოლაში ვსწავლობდი. დაახლოებით 14 წლის ვიყავი და სწორედ ამ დროს გიყალიბდება მუსიკისადმი სიყვარული", — ამბობს პიტ სტოუკსი.

აღსანიშნავია, რომ ალბომის 30 წლის იუბილესთან დაკავშირებით ნირვანა მის გამოცემაც ხელახლა აპირებს. ალბომს იგივე გარეკანი ექნება მიუხედავად იმისა, რომ ცოტა ხნის წინ ჯგუფს ყდაზე გამოსახულმა ბავშვმა უჩივლა.

30 წლის სპენსერ ელდენი ალბომის გარეკანზე შიშველია გამოსახული. ის ჯგუფსა და ალბომის გამოშვებასთან დაკავშირებულ პირებს პორნოგრაფიის შემცველი მასალის ფლობაში, გავრცელებასა და კომერციული მიზნებისთვის გამოყენებაში ადანაშაულებს. ელდენი 17 მოპასუხისგან სათითაოდ $150 000-ის გადახდას ან სასამართლოს მიერ გამოთვლილი და დადგენილი ზიანის ანაზღაურებას ითხოვს.

აღსანიშნავია, რომ ელდენმა ალბომის 25 წლის იუბილე ცნობილი ფოტოს გაცოცხლებით აღნიშნა. ამის შემდეგ კი ჯგუფის წინააღმდეგ სარჩელის შეტანის გამო ელდენი საზოგადოების კრიტიკის ქარცეცხლში მოხვდა.

ამავე თემაზე: