მსოფლიო ბედნიერების 2017 წლის გაეროს ანგარიშში ნორვეგია ყველაზე ბედნიერ ქვეყანად დასახელდა, ხოლო საქართველოს 125-ე ადგილს იკავებს.

ბოლო ოთხი წლის განმავლობაში, ნორვეგია მეოთხე ადგილს იკავებდა, ახლა კი სამგზის ყველაზე ბედნიერი ქვეყანა, დანია შეცვალა.

წინა წლების მსგავსად, მოწინავე ადგილებს ისევ სკანდინავიის ქვეყნები იკავებენ. ნორვეგიის შემდეგ, ყველაზე ბედნიერი ქვეყნების პირველ ათეულში მოხვდნენ:

  • დანია
  • ისლანდია
  • შვეიცარია
  • ფინეთი
  • ნიდერლანდები
  • კანადა
  • ახალი ზელანდია
  • ავსტრალია
  • შვედეთი

გერმანიამ, დიდმა ბრიტანეთმა და საფრანგეთმა, მე-16, მე-18 და 31-ე ადგილები გაინაწილეს.

გაეროს გენერალური მდივნის სპეციალური მრჩეველი და კვლევის თანაავტორი ჯეფრი საქსი The Guardian-თან ინტერვიუში ამბობს, რომ ბედნიერი ქვეყანა კეთილდღეობის ჯანსაღ ბალანსს, სოციალურ კაპიტალს, ნდობის მაღალ ხარისხს საზოგადოებაში, უთანასწორობის დაბალ დონესა და სანდო მთავრობას ნიშნავს.

აშშ-მა, გასულ წელთან შედარებით, ერთით დაბლა გადაინაცვლა და მე-14 ადგილი დაიკავა. ჯეფრი საქსის თქმით, შტატებმა პოზიცია უთანასწორობის, კორუფციისა და ტრამპის ეკონომიკური პოლიტიკის გამო დაკარგეს.

ფოტო: UN

კვლევის მიხედვით, 155 ქვეყანას შორის, ყველაზე ნაკლებად ბედნიერები ცენტრალური აფრიკის რესპუბლიკაში არიან, მასთან ერთად კი სიის უკანასკნელ ადგილებს იკავებენ:

  • ბურუნდი
  • ტანზანია
  • სირია
  • რუანდა
  • ტოგო
  • გვინეა
  • ლიბერია
  • სამხრეთ სუდანი
  • იემენი

მსოფლიო ბედნიერების პირველი ანგარიში, გაერომ 2012 წელს გამოაქვეყნა. ქვეყნების რიგითობა ეფუძნება ექვს ფაქტორს, მათ შორის, ერთ სულ მოსახლეზე მთლიან შიდა პროდუქტს, ცხოვრების ხანგრძლივობას, თავისუფლებას, სიუხვეს, სოციალურ მხარდაჭერასა და კორუფციის არარსებობას მთავრობაში ან ბიზნესში.