ამერიკელ მსახიობს, ჯონი დეპს, ესპანურ კინოფესტივალზე კარიერაში მიღწეული წარმატებისთვის მთავარი ჯილდო გადასცეს. პრიზის მიღების შემდეგ წარმოთქმულ სიტყვაში მსახიობმა საკუთარი თავი "ბოიკოტის გამოცხადების კულტურის" (Cancel Culture) მსხვერპლად წარმოადგინა და განაცხადა, რომ ამ ტენდენციამ უკვე მთელი კინოინდუსტრია მოიცვა.

დეპის განცხადებები იმ შეკითხვებს მოჰყვა, რომლებიც ჟურნალისტებმა მსახიობს სან-სებასტიანის კინოფესტივალზე დაუსვეს ჰოლივუდში რეპუტაციის დაკარგვასთან დაკავშირებით.

"ძალიან რთული სიტუაციაა, მთელი ეს ბოიკოტის გამოცხადების კულტურა, ან განაჩენის ასე ნაუცბადევად გამოტანა იმაზე დაყრდნობით, რაც დაბინძურებულ ჰაერს ჰგავს", — განაცხადა 58 წლის მსახიობმა შეკითხვის პასუხად, — "ყველაფერი იქამდე მივიდა, რომ, შემიძლია, დარწმუნებით გითხრათ, თავი ქუდში აღარავის არ აქვს. არცერთ თქვენგანს, მანამდე, სანამ ვინმე რამის თქმას მოისურვებს".

დეპმა ჰოლივუდის მხრიდან "ბოიკოტის გამოცხადების" შესახებ აგვისტოშიც ილაპარაკა The Sunday Times-ისთვის მიცემულ ინტერვიუში.

ფოტო: EPA/GETTY IMAGES

აღსანიშნავია, რომ სან-სებასტიანის კინოფესტივალის ორგანიზატორის გადაწყვეტილება, ჯონი დეპისთვისთვის ღონისძიების მთავარი ჯილდო გადაეცა, ბევრმა ადამიანმა გააკრიტიკა. მათი თქმით, ეს გადაწყვეტილება არასწორ შეტყობინებას უგზავნის გენდერული ნიშნით ძალადობის მსხვერპლებს. თუმცა, ფესტივალის დირექტორმა საკუთარი პოზიცია დაიცვა.

"ახლანდელ დროში, როცა სოციალურ ქსელებში ადამიანების ლინჩის წესით გასამართლება გავრცელებული ფენომენია, ყოველთვის დავიცავთ ორ უმთავრეს პრინციპს, რომელიც ჩვენი კულტურიდან და სამართლიდან წარმოდგება: უდანაშაულობის პრეზუმფციას და რეინტეგრაციის უფლებას", — განაცხადა სან-სებასტიანის კინოფესტივალის ხელმძღვანელმა, ხოსე ლუის რებორდინოსმა.

გასულ წელს დეპმა ბრიტანულ ტაბლოიდთან სასამართლო დავა წააგო. გამოცემა მსახიობს ოჯახში ძალადობაში — ყოფილ ცოლზე, ამბერ ჰერდის ფიზიკურ შეურაცხყოფაში — ადანაშაულებდა, საქმეზე მოსამართლემ კი დაასკვნა, რომ ბრალდებები "არსებითად მართალი" იყო. მარტის თვეში ბრიტანულმა სასამართლომ დეპს გადაწყვეტილების გასაჩივრების თხოვნაზე უარით უპასუხა და განაცხადა, რომ მსახიობის მცდელობა "უპერსპექტივო" იყო.

დეპი ჰერდსაც უჩივის The Washington Post-ში გამოქვეყნებული ოპ-ედის გამო, სადაც მსახიობმა ქალმა ოჯახში ძალადობაზე ღიად ილაპარაკა. აღნიშნულ საქმეზე სასამართლო პროცესი 2022 წლის აპრილამდეა გადადებული.

მანამდე კი, ჯონი დეპს ერთ-ერთი წარმატებული პროექტის, Fantastic Beasts-ის ფრენჩაიზის დატოვება მოუწია. როგორც ცნობილია, მსახიობს ეს თავად კინოკომპანია Warner Bros.-ის ხელმძღვანელობამ მოსთხოვა. საბოლოოდ, სერიის მესამე ფილმში, რომელიც მომავალი წლის აპრილში გამოვა, დეპი მადს მიკელსენმა ჩაანაცვლა.