ჯანდაცვის სამინისტროს ინფორმაციით, თურქულმა მხარემ საქართველოში სახელმწიფო შესყიდვების ფარგლებში, მედიკამენტების დაბალ ფასში მოწოდებასთან დაკავშირებით მზადყოფნა გამოთქვა. უწყების განცხადებით, მიღწეულია შეთანხმება იმის თაობაზეც, რომ ორი ქვეყნის ჯანდაცვის სექტორს შორის სამედიცინო შემთხვევებთან დაკავშირებით ერთობლივი გადაწყვეტილებები მიიღება.

თურქეთის რესპუბლიკაში საქართველოს ჯანდაცვის მინისტრის მოადგილე გიორგი წოწკოლაური თურქეთის რესპუბლიკის ჯანმრთელობის დაცვის მინისტრის მოადგილეს თოლგა თოლუნაის შეხვდა. შეხვედრისას ჯანდაცვის სფეროში ორმხრივად შეთანხმებული პროექტების განხორციელებასა და ონკოლოგიური პაციენტებისთვის თურქეთის რესპუბლიკაში სამედიცინო მომსახურების მიღებაზე ისაუბრეს.

"სამუშაო ვიზიტის მიზანი, 2020 წლის 8 დეკემბერს საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტროსა და თურქეთის რესპუბლიკის ჯანმრთელობის დაცვის სამინისტროს საერთაშორისო სამედიცინო მომსახურების სააგენტოს (USHAŞ) შორის ჯანმრთელობის დაცვის სფეროში თანამშრომლობის შესახებ გაფორმებული მემორანდუმია", — ნათქვამია ჯანდაცვის სამინისტროს განცხადებაში.

უწყების ინფორმაციით, შეხვედრაზე შეთანხმებას მიაღწიეს, რომლის მიხედვითაც, როგორც საქართველოში, ისე თურქეთში, მოხდება სამედიცინო ტრენინგების ჩატარება.