აშშ-ის სახელმწიფო დეპარტამენტი გმობს რუსეთის მიერ საარჩევნო უბნების ორგანიზებას იმ ტერიტორიებზე, რომელიც საქართველოს, მოლდოვასა და უკრაინას ეკუთვნის მაშინ, როცა სახელწმიფოებს ამაზე ნებართვა არ გაუცემიათ. ასე ეხმაურება დეპარტამენტის სპიკერი, ნედ პრაისი ოკუპირებულ ტერიტორიებზე ჩატარებულ რუსეთის დუმის არჩევნებს.

"ამერიკის შეერთებული შტატები სინანულს გამოთქვამს რუსეთის იმ რეპრესიული ქმედებების გამო, რომელმაც შეაფერხა დუმის არჩევნებზე თავისუფლება, სამართლიანობა და სანდოობა. ჩვენ ვგმობთ რუსეთის საარჩევნო უბნების ორგანიზებას საქართველოს, მოლდოვასა და უკრაინის ტერიტორიებზე მათი თანხმობის გარეშე", — წერს პრაისი ტვიტერზე.

საქართველოს საგარეო საქმეთა სამინისტროს ინფორმაციით, რუსეთის დუმის არჩევნებში ოკუპირებულ ტერიტორიებზე მცხოვრები მოქალაქეებიც მონაწილეობდნენ. სამინისტროში განმარტავენ, რომ საქართველოს მოქალაქეების რუსეთის დუმის არჩევნებში მონაწილეობა მათი იძულებითი პასპორტიზაციის შედეგია და აღნიშნავენ, რომ ეს ქმედება უკანონოა.

რუსეთის ცესკოს თანახმად, ვლადიმერ პუტინის პარტიამ ერთიანი რუსეთი ქვეყნის საპარლამენტო არჩევნები მოიგო. ოპოზიციის წარმომადგენლები აცხადებენ, რომ არჩევნები გაყალბდა.

დამოუკიდებელმა სადამკვირვებლო ორგანიზაციამ Golos ქვეყნის მასშტაბით 3 600-მდე დარღვევა დააფიქსირა, რომელთა უმეტესობა ფოტოებითა და ვიდეო კადრებით არის დოკუმენტირებული. აშშ, დიდი ბრიტანეთი და ევროკავშირი შექმნილ საარჩევნო პირობებს აკრიტიკებს.