საქალაქო სასამართლომ 20 ივნისს დაზარალებული, ლუკა პეტრიაშვილისთვის შინაგან საქმეთა სამინისტროს კომპენსაციის სახით 35 ათასი ლარის გადახდა დააკისრა. ინფორმაცია On.ge-ს დაზარალებულის ადვოკატმა, ბექა ბასილაიამ დაუდასტურა.

"მთავარი მოთხოვნა დააკმაყოფილა, რომ ცნო როგორც მორალურ ნაწილში დაზიანებულად სახელმწიფოს მიერ, ისე ფიზიკური თვალსაზრისითაც ზიანი დაადგინა და ასევე, დაადგინდა, რომ შრომისუნარიანობის მოშლა გამოიწვია სახელმწიფო ორგანოს წარმომადგენლის არამართლზომიერმა ქმედებამ", — განაცხადა მან.

On.ge აღნიშნულზე საქალაქო სასამართლოსაც დაუკავშირდა, სადაც ინფორმაცია დაგვიდასტურეს. მათი თქმით, სასამართლომ მატერიალური ზიანისთვის 15 ათასი ლარი და მორალური ზიანისათვის 20 ათასი ლარი დააკისრა შსს-ს.

2019 წლის 20 ივნისს აქცია მას შემდეგ დაიწყო, რაც რუსეთის დუმის დეპუტატი საქართველოს პარლამენტის თავმჯდომარის სავარძელში დაჯდა. ხალხმრავალი აქცია პარლამენტის თავმჯდომარის გადადგომის მოთხოვნით გაგრძელდა. ირაკლი კობახიძე მხოლოდ მომდევნო დღეს გადადგა, მანამდე სპეცრაზმმა აქციაზე შეკრებილები ცრემლსადენი გაზისა და რეზინის ტყვიების გამოყენებით დაშალა. რამდენიმე მოქალაქემ დაკარგა თვალი. მთავრობა ამტკიცებს, რომ შეკრებილები პარლამენტის შტურმით აღებას აპირებდნენ.