ქართული ოცნების თავმჯდომარის, ირაკლი კობახიძის შეფასებით, ევროკავშირის ელჩის საქართველოში, კარლ ჰარცელის განცხადება "დიპლომატიურ სტანდარტს ოდნავ აცდენილი იყო". ამის შესახებ მან ჟურნალისტებთან ისაუბრა.

"ის, რომ ჩვენი მეგობრები ინტერესდებიან ასეთი ფაქტებით, არის აბსოლუტურად ბუნებრივი, როდესაც არის თუნდაც ნიშნები იმის, რომ შეიძლება, ვიღაცა ვიღაცას უსმენდეს უკანონოდ, რა თქმა უნდა, ამით ჩვენი მეგობრები დაინტერესდებოდნენ და დაინტერესდნენ კიდეც. ამიტომ ყველაფერს უნდა მოეფინოს ნათელი, ვინ რა ინფორმაცია გაიტანა, რა იყო ავთენტური, რა შეესაბამება სიმართლეს და ასე შემდეგ.

ამაზე ზოგადი შეფასებები ჩვენგან იცით, თუმცა რაც შეეხება კონკრეტულად ელჩის განცხადებას, მე არ ვარ დიპლომატი და შეიძლება, ვერ ვერკვევი ამ საკითხებში, მაგრამ დიპლომატიურ სტანდარტებს ოდნავ, მე მგონი, იყო აცდენილი, მით უმეტეს, ამ წინასაარჩევნო პერიოდში ეს განცხადება", — აღნიშნა მან.

დღეს, 22 სექტემბერს ჰარცელმა გავრცელებულ ფაილებსა და სავარაუდო მოსმენებზე თქვა, რომ ბუნებრივად არ მიაჩნიათ, როდესაც პარტნიორი და მეგობარი ქვეყანა, როგორიც საქართველოა, მათი წინააღმდეგ მიმართული მსგავსი ტიპის საქმიანობაში იყოს ჩართული. მისივე განცხადებით, აღნიშნულიდან გამომდინარე, საქართველოს ელჩი ევროკავშირში, ვახტანგ მახარობლიშვილი სახელმწიფო უსაფრთხოების სამსახურიდან გამოჟონილ ფაილებთან დაკავშირებით ბრიუსელში დაიბარეს.