არასამთავრობო ორგანიზაციები კორცხელში მომხდარ ინციდენტზე ცემის მუხლით დაწყებული გამოძიების გადაკვალიფიცირებას ითხოვენ, რადგან მიიჩნევენ, რომ ცემის გარდა აღნიშნულ ინციდენტში სხვა დანაშაულებიც იკვეთება.

საერთაშორისო გამჭვირვალობა - საქართველოს წარმომადგენლის, ეკა გიგაურის განმარტებით მნიშვნელოვანია, სახელმწიფოს ადეკვატური რეაქცია ჰქონდეს კორცხელში მომხდარი ინციდენტთან დაკავშირებით, რადგან თუ ასეთი ფაქტები გაგრძელდება, ისინი ოქტომბრის საპარლამენტო არჩევნებზე უარყოფით გავლენას მოახდენენ:

"მიგვაჩნია, რომ ჟურნალისტებისათვის ხელის შეშლა ასევე დანაშაულია და ეს დანაშაული დაუსჯელი არ უნდა დარჩეს".

საქართველოს დემოკრატიული ინიციატივის წარმომადგენელი, გიორგი მშვენიერაძე კი განმარტავს, რომ უამრავი მუხლი არსებობს იმისთვის, რომ კორცხელში მომხდარი დანაშაულებები დაკვალიფიცირდეს:

"მინიმუმ უნდა დაემატოს დევნა პოლიტიკური ნიშნის მიხედვით, რომელიც მნიშვნელოვან დანაშაულს წარმოადგენს სისხლის სამართლის კოდექსით. მეორე მხრივ, თუ გამოძიება თვლის, რომ ეს არ იყო წინასწარგანზრახული პოლიტიკური მოტივით ადამიანების დევნა, მაშინ სახეზე გვაქვს ხულიგნობის მუხლის მე-3 ნაწილი".

მშვენიერაძე მიიჩნევს, რომ თავად ის ფაქტი, რომ იუსტიციის მინისტრი და სახელმწიფო აპელირებენ, თითქოს არის პრობლემები საქმის გამოძიებასთან დაკავშირებით, არასწორია და არ არის გამართლება:

"ეს, ბუნებრივია, ასე არ არის და, სამწუხაროდ, პოლიცია და შსს არაადეკვატური მოქმედებით და პოლიტიკოსები არასწორი განცხადებებით ახალისებენ სამომავლო ძალადობას".

ზუგდიდში, კორცხელის საარჩევნო უბანზე, სადაც შუალედური ადგილობრივი თვითმმართველობის არჩევნები მიმდინარეობდა, ნაციონალური მოძრაობის წევრებს, მათ შორის გიგა ბოკერიასა და ნიკა მელიას, ფიზიკური შეურაცხყოფა მიაყენეს.