ერთიანი ნაციონალური მოძრაობის წევრი, ირმა ნადირაშვილი აცხადებს, რომ კორცხელის ინციდენტში ჭაბუკ მოჭიდავეთა ეროვნული ნაკრების მწვრთნელი, გია იანთბელიძე იღებდა მონაწილეობას. ნადირაშვილი ჭიდაობის ეროვნულ ფედერაციასა და სპორტის სამინისტროს მიმართავს, რომ დაატოვებინონ აღნიშნულ პირს თანამდებობა.

იანთბელიძე ნადირაშვილის განცხადებას პასუხობს და განმარტავს, რომ კორცხელში იმყოფებოდა, თუმცა ფიზიკურ დაპირპისპირებაში მონაწილეობა არ მიუღია.

ჭიდაობის ფედერაციის პრეზიდენტი, მანუჩარ კვირკველია კი აცხადებს, რომ თუ იანთბელიძის კორცხელის ინციდენტში მონაწილეობა დადასტურდება, უწყებას შესაბამისი რეაგირება ექნება:

"მემგონი საქმეც აღძრული არის, გამოიძიებენ და შევაჯამებთ ამ ყველაფერს. რომ დადასტურდეს, ჩვენთან სადისციპლინო კომისია უნდა შეიკრიბოს, განიხილოს და შემდეგ გადავწყვეტთ, როგორ უნდა მოხდეს ამ ადამიანის მუშაობა".

სპორტის მინისტრის, ტარიელ ხეჩიკაშვილის განმარტებით, სამინისტროც გამოძიების შედეგებს ელოდება და იმ შემთხვევაში, თუ იანთბელიძის ბრალეულობა დადგინდება, აუცილებელია შესაბამისმა ფედერაციებმა სწორი გადაწყვეტილება მიიღონ:

"ერთხელ და სამუდამოდ ყველამ უნდა დაიმახსოვროს, კანონის მიმართ ყველა თანაბრად პასუხისმგებელი ვართ. გინდა მწვრთნელი იყოს, გინდა სახელოვანი სპორტსმენი, რა ტიტულებიც არ უნდა ჰქონდეს".

22 მაისს, ზუგდიდში, კორცხელის საარჩევნო უბანზე, სადაც შუალედური ადგილობრივი თვითმმართველობის არჩევნები მიმდინარეობდა, ნაციონალური მოძრაობის წევრებს, მათ შორის გიგა ბოკერიასა და ნიკა მელიას, ფიზიკური შეურაცხყოფა მიაყენეს.