22 მაისს კორცხელის ინციდენტში მონაწილე პირები შინაგან საქმეთა სამინისტროში დასაკითხად თავისი ნებით გამოცხადდნენ.

სპორტსმენების ამბობენ, რომ ისინი ქართული ოცნების მხარდამჭერები არიან, მათ დასამალი არაფერი აქვთ და შსს-ში მივიდნენ, რათა გამოძიებას საკუთარი ინფორმაცია მიაწოდონ.

სპორტსმენებს შორის ერთ-ერთმა კობა ტყეშელაშვილმა რუსთავი 2-ის ჟურნალისტს უთხრა, რომ კორცხელის საარჩევნო უბნის მიმდებარე ტერიტორიაზე მომხდარი ინციდენტი ნაციონალური მოძრაობის წევრმა ნიკა მელიამ გამოიწვია და სწორედ ამის თქმას აპირებს ის გამოძიებისთვის.

ტყეშელაშვილის თქმით, მან მოისმინა შინაგან საქმეთა მინისტრის განცხადება და ამის შემდეგ გადაწყვიტა მან გამოძიებისთვის საკუთარი ვერსიის მოყოლა:

"ჩვენ ქართველ ხალხს ყოველთვის გვერდით დავუდგებით, ჩვენ არ ვართ ზონდერები, რადგან სახეს არ ვმალავთ, პირველი ზონდერი ვინც იყო ძალიან კარგად იცით და სახე დამალული რომ ჩხუბობდა მაინც რომ ჩანდა".

კობა ტყეშელაშვილის თქმით, ზუგდიდში ექსკურსიაზე ჩასული არ ყოფილა და თავისი მეგობრის ამ განცხადებას არ იზიარებს:

"2012 წლიდან ქართული ოცნების წევრი ვარ. ეს არსად არ დამიმალია, ექსკურსიაზე არ ვყოფილვარ, ჩავედი, რომ ქართულ ოცნებას და ქართველ ხალხს დავუდგე მხარში, რომ დაშინებული ხალხი ისევ არ დააშინონ".

ტყეშელაშვილის თქმით, ძალიან ცუდია, რომ ეს ფაქტი მოხდა, თუმცა ნაციონალური მოძრაობის წევრებმა მათ სხვა გზა არ დაუტოვეს. მისი თქმით, პირველად იერიშზე ნიკა მელია გადავიდა და მათ ქვების სრულა დაუწყო, რის შემდეგაც მას ხელი აქვს დალურჯებული.

ტყეშელაშვილის გარდა შსს-ში კორცხელის ინციდენტში მონაწილე სხვა პირებიც მივიდნენ, რომლებიც სამინინისტროსთან შეკრებილმა ხალხმა გაამხნევა.