გერმანიის კანცლერი, ანგელა მერკელი და აშშ–ს პრეზიდენტი დონალდ ტრამპი ერთმანეთს პირველად შეხვდნენ. მერკელი ამერიკის შეერთებულ შტატებში 16 მარტს უნდა ჩასულიყო, თუმცა შტორმის გამო ვიზიტი ერთი დღით გადაიდო.

მნიშვნელოვანი და საგულისხმო მომენტი, რაც ჟურნალისტებს არ გამოპარვიათ, არის ის, რომ ორი ქვეყნის ლიდერებმა ჟურნალისტებთან ფოტოსთვის პოზირებისას ერთმანეთს ხელი არ ჩამოართვეს, რაც როგორც წესი, მსგავს დროს ჩვეულებრივი წესია.

ტრამპმა მერკელის თანდასწრებით იხუმრა, რომ გერმანიის კანცლერსა და მას აქვთ "რაღაც საერთო". ტრამპმა აღნიშნულში იგულისხმა ის, თითქოს ორივე ლიდერს ფარულად უთვალთვალებდა ობამას ადმინისტრაცია.

ედვარდ სნოუდენის მიერ გარკვეული პერიოდის წინ გამოქვეყნებული მასალებით გაირკვა, რომ CIA სხვადასხვა ქვეყნის ლიდერს, მათ შორის გერმანიის კანცლერს, ფარულად უსმენდა. ტრამპი კი ასევე ამტკიცებს, რომ ობამას ადმინისტრაცია საარჩევნო კამპანიისას ტრამპ თაუერს უთვალთვალებდა ფარულად.

ორი ქვეყნის ლიდერებმა ერთობლივ პრესკონფერენციაზე ისაუბრეს ნატოს დაფინანსების საკითხზეც. ტრამპმა დაადასტურა ნატოსადმი თავისი პატივისცემა, თუმცა, აღნიშნა, რომ ალიანსის წევრებმა თავიანთი წილი სამხედრო გაერთიანებაში უნდა გადაიხადონ "სამართლიანად". მან ნატოს ამჟამინდელი დაფინანსების ფორმას "უსამართლო" უწოდა. პრესკონფერენციაზე ასევე ცნობილი გახდა, რომ გერმანია ნატოს დააფინანსებს მთლიანი შიდა პროდუქტის 2 პროცენტით, რაც მნიშვნელოვანი ზრდაა. ჩრდილო–ატლანტიკურ ალიანსში გერმანია საწევროს სახით ამჟამად იხდის მშპ–ს 1,19 პროცენტს.

როგორც FOX News საკითხის მცოდნე წყაროზე დაყრდნობით წერს, გერმანიის კანცლერმა ნატოს დაფინანსების გაზრდაზე მას შემდეგ განაცხადა, რაც პირისპირ შეხვედრისას ტრამპს მერკელთან ამ თემაზე "მძიმე" საუბარი ჰქონდა.

მიუხედავად იმისა, რომ ტრამპი და მერკელი თავიანთ პირველ შეხვედრამდე ერთმანეთის მიმართ არ იშურებდნენ უმწვავეს განცხადებებს, საბოლოო ჯამში, როგორც ანალიტიკოსები საუბრობენ, შეხვედრამ კონსტრუქციულ გარემოში ჩაიარა.