დაავადებათა კონტროლის ეროვნული ცენტრის ხელმძღვანელის, ამირან გამყრელიძის განცხადებით, ქვეყანაში ბოლო დღეების განმავლობაში ეპიდსიტუაცია ნელი ტემპით, მაგრამ დამშვიდებისკენ მიდის, ამაზე კი კოვიდსიტუაციის ინდიკატორები მეტყველებს. მისივე თქმით, შემცირებულია კორონავირუსის გამოვლენის დადებითობის დღიური მაჩვენებელიც.

"ეპიდსიტუაცია ბოლო დღეების განმავლობაში, ძალიან ნელი ტემპით, მაგრამ მიდის დამშვიდებისკენ. ამაზე მეტყველებს რამდენიმე ინდიკატორი, რომელიც ახასიათებს ეპიდსიტუაციას. პირველ რიგში, ეს არის ახალი შემთხვევების რაოდენობა, აბსოლუტური, ან 100 000 მოსახლეზე გადათვლილი, ეს არის დადებითობის მაჩვენებელი, რეპროდუქციის ინდექსი და ბოლო, ყველაზე მძიმე, ეს გახლავთ სიკვდილიანობის მაჩვენებელი", — ამის შესახებ გამყრელიძემ ჟურნალისტებთან გამართულ ვებინარზე განაცხადა.

17 სექტემბრის მონაცემებით, საქართველოში კორონავირუსის 2 039 ახალი შემთხვევა დადასტურდა, გამოჯანმრთელდა 2 192, ხოლო გარდაიცვალა — 56 ადამიანი.

Stopcov.ge-ზე გამოქვეყნებული ინფორმაციის თანახმად, დადებითობის დღიური მაჩვენებელი არის 6,47%, ბოლო 14 დღის განმავლობაში — 7,31%, ხოლო 7 დღის — 7,20%.