მოძრაობა სირცხვილია აცხადებს, რომ ქართული ოცნების თავმჯდომარის ირაკლი კობახიძის მიერ წაყენებული ბრალდებები სიცრუეა. მათი თქმით, მსგავსი კომუნიკაცია არასდროს არავისთან ჰქონიათ, რადგან მმართველი პარტიისგან განსხვავებით ადამიანის სიცოცხლის ფასი იციან.

"ირაკლი კობახიძის განცხადება მოძრაობა სირცხვილიასთან დაკავშირებით ტყუილია. სრული პასუხისმგებლობით ვაცხადებთ, რომ მსგავსი შინაარსის კომუნიკაცია სირცხვილიას არც ერთ წევრს, არც ერთ საკომუნიკაციო არხსა თუ რეალურ სივრცეში არასდროს განუხორციელებია, რადგან მათგან განსხვავებით, კარგად ვიცით ადამიანის სიცოცხლის ფასი", — ვკითხულობთ განცხადებაში.

მათი თქმით, მმართველი პარტია დეზინფორმაციის გასავრცელებლად სოციალურ ქლელს იყენებდა, ამჯერად პარტიის თავმჯდომარე, პირდაპირ ეთერში "მოგვევლინა ტროლის როლში".

"თუ აქამდე მსგავსი დეზინფორმაციული კამპანიებისთვის ფეისბუქზე ყალბ ანგარიშებსა და სამთავრობო მედიებს იყენებდნენ, ახლა თავად ქართული ოცნების თავმჯდომარე, ირაკლი კობახიძე მოგვევლინა ტროლის როლში (სიზუსტისთვის უნდა ვთქვათ, რომ ეს შემთხვევა პირველი არ არის, თუმცა ამჯერად ბრალდებები კიდევ უფრო მძიმეა)", — აცხადებენ მოძრაობის წევრები.

სირცხვილიას განცხადებით, ხელისუფლებისთვის ისინი დაარსების დღიდან გადაულახავ წინააღმდეგობას წარმოადგენენ, ამას კი დაემატა ისიც, რომ წლევანდელ თვითმმართველობის არჩევნებზე სამოქალაქო საარჩევნო კომისიის პროექტის ფარგლებში მოძრაობა წინასაარჩევნო მონიტორინგს აწარმოებს. სირცხვილიას თქმით, სწორედ ამის გამო ქართული ოცნება მათ წინააღმდეგ მიზანმიმართულ პროპაგანდას უკვე მთელი ძალით წარმართავს.

ქართული ოცნების თავმჯდომარემ, ირაკლი კობახიძემ ჩანაწერების გავრცელების შემდეგ, ბრიფინგზე განაცხადა, რომ ნაციონალური მოძრაობა წინასაარჩევნოდ მძიმე პროვოკაციას ამზადებს. კობახიძე ამტკიცებს, რომ ამ ინფორმაციამ ნაციონალური მოძრაობისა და მოძრაობა სირცხვილიას წევრების საუბრებიდან და ჩატებიდან გაჟონა.

13 სექტემბერს ცნობილი გახდა, რომ ერთ-ერთი ღია წყაროზე სასულიერო პირებთან დაკავშირებით მასალები აიტვირთა. უცნობია, ვინ გაავრცელა ფაილები და ასევე, არ არის დადასტურებული მათი ავთენტურობა. თუმცა რამდენიმე პოლიტიკოსმა და ჟურნალისტმა, მათ შორის On.ge-ს ყოფილმა რედაქტორმა განაცხადეს, რომ ჩანაწერებში საკუთარი საუბრები ამოიცნეს.

ატვირთულია Word-ის ათასობით ფაილი და იმ შემთხვევაში, თუ ისინი ავთენტურია, ჩანს, რომ შესაბამისი სამსახურები სწავლობენ სასულიერო პირების საჯარო და პირად კავშირებს, უსმენენ სატელეფონო საუბრებს და აგროვებენ კომპრომატებს პირადი ცხოვრების შესახებაც, მათ შორის, საუბარია ჰომოსექსუალურ კავშირებზე.

ჩანაწერების გამოქვეყნებიდან მეორე დღეს, სახელმწიფო უსაფრთხოების სამსახურმა განცხადება გაავრცელა, სადაც აღნიშნავს, რომ მსგავსი ინფორმაციის ტირაჟირება შეურაცხყოფს ცალკეული ადამიანების, უსაფრთხოების ოფიცრებისა და მთლიანად სამსახურის პატივსა და ღირსებას. უწყებამ მოუწოდა მედიასა და პოლიტიკურად დაინტერესებულ პირებს, გამოძიების დასრულებამდე თავი შეიკავონ არაზუსტი და გადაუმოწმებელი ინფორმაციის გავრცელებისგან.

გაიგეთ მეტი გავრცელებულ ჩანაწერებზე:

• პედოფილია, პირადი ცხოვრების დეტალები და კავშირები რუსეთთან — რა წერია გავრცელებულ ფაილებში, ნაწილი I
• პრეზიდენტი აპირებდა თავისი გამოსვლის ტექსტი პატრიარქისთვის შესასწორებლად გადაეგზავნა — გავრცელებული ჩანაწერები
• როგორ დაგეგმეს პატრიარქმა და მმკ-მ "ოჯახის სიწმინდის დღის" შექმნა — მასალები ჩანაწერებიდან