ნაციონალური მოძრაობის ერთ-ერთი ლიდერის, თინა ბოკუჩავას თქმით, ქართული ოცნების წარმომადგენლების განცხადებები იმდენად არაადეკვატურია, რომ მწყობრი და რაციონალური შეფასების გაკეთება უჭირს.

"იმდენად არაადეკვატურები არიან საკუთარ განცხადებებში ბატონი კობახიძე, ბატონი ღარიბაშვილი, ბატონი მდინარაძე, რომელიც ასევე გამოირჩეოდა არაადეკვატურობით, როდესაც შეაფასა ეს ჩანაწერები, რომლებიც გასაჯაროვდა, რომ სიმართლე გითხრათ, ძალიან მიჭირს რაციონალური და მწყობრი შეფასების გაკეთება", — განაცხადა ბოკუჩავამ ფორმულას ეთერში.

მისი განცხადებით, მსგავსი განცხადებების მიზანი ქაოსის, პანიკის, შიშისა და პოლარიზაციის გამოწვევაა.

"გათვლა არის ქაოსი, რა თქმა უნდა, ქაოტური წინასაარჩევნო გარემო, პანიკა, შიში, პოლარიზაცია და ამით საქართველოს მოქალაქეებისთვის რეალურად ხელის გადაგრეხვის და მათი ნების უგულებელყოფის ფონზე ძალაუფლების შენარჩუნება",— განაცხადა მან.

ქართული ოცნების თავმჯდომარემ, ირაკლი კობახიძემ ჩანაწერების გავრცელების შემდეგ, ბრიფინგზე განაცხადა, რომ ნაციონალური მოძრაობიდან გაჟონა ინფორმაციამ, რომ ისინი წინასაარჩევნოდ მძიმე პროვოკაციას ამზადებენ.