პარტია ლელოს თავმჯდომარე, მამუკა ხაზარაძე აცხადებს, რომ თანამდებობიდან უნდა გადადგეს სახელმწიფო უსაფრთხოების სამსახურის თავმჯდომარე, გრიგოლ ლილუაშვილი. ასე გამოეხმაურა ის სასულიერო პირებთან დაკავშირებით გავრცელებულ ფაილებს.

"ასეთი საკითხი როცა დგება და ასეთი მოვლენა როცა ხდება, ნებისმიერ ქვეყანაში, მინიმუმ სუს-ის ხელმძღვანელი უნდა გადადგეს თანამდებობიდან და პოლიტიკური პასუხისმგებლობა უნდა აიღოს პრემიერმინისტრმა", — განაცხადა მამუკა ხაზარაძემ.

ხაზარაძე ამბობს, რომ ამ საქმის გამოსაძიებლად უნდა შეიქმნას საპარლამენტო კომისია.

13 სექტემბერს ცნობილი გახდა, რომ ერთ-ერთი ღია წყაროზე სასულიერო პირებთან დაკავშირებით მასალები აიტვირთა. უცნობია, ვინ გაავრცელა ფაილები და ასევე, არ არის დადასტურებული მათი ავთენტურობა. თუმცა რამდენიმე პოლიტიკოსმა და ჟურნალისტმა, მათ შორის On.ge-ს ყოფილმა რედაქტორმა განაცხადეს, რომ ჩანაწერებში საკუთარი საუბრები ამოიცნეს.

ატვირთულია Word-ის ასობით ფაილი და იმ შემთხვევაში, თუ ისინი ავთენტურია, ჩანს, რომ შესაბამისი სამსახურები სწავლობენ სასულიერო პირების საჯარო და პირად კავშირებს, უსმენენ სატელეფონო საუბრებს და აგროვებენ კომპრომატებს პირადი ცხოვრების შესახებაც, მათ შორის, საუბარია ჰომოსექსუალურ კავშირებზე. ფაილებს შორის არის ინფორმაცია რუსული კონტაქტების, ასევე, კონკრეტული პოლიტიკური პარტიების მიმართ დამოკიდებულების შესახებ.

ჩანაწერების გამოქვეყნებიდან მეორე დღეს, სახელმწიფო უსაფრთხოების სამსახურმა განცხადება გაავრცელა, სადაც აღნიშნავს, რომ მსგავსი ინფორმაციის ტირაჟირება შეურაცხყოფს ცალკეული ადამიანების, უსაფრთხოების ოფიცრებისა და მთლიანად სამსახურის პატივსა და ღირსებას. უწყებამ მოუწოდა მედიასა და პოლიტიკურად დაინტერესებულ პირებს, გამოძიების დასრულებამდე თავი შეიკავონ არაზუსტი და გადაუმოწმებელი ინფორმაციის გავრცელებისგან.

გაიგეთ მეტი: