კულტურის მინისტრი თეა წულუკიანი ფარულ მოსმენებთან დაკავშირებულ გავრცელებულ ფაილებზე ამბობს, რომ სიბინძურეა და კომპრომისი შეუძლებელია. მან, ასევე, აღნიშნა, რომ სავარაუდოდ, ფარული ჩანაწერები კიდევ გავრცელდება. ის ფარული მიყურადების მასალების გავრცელებაში ოპოზიციას ადანაშაულებს.

"ახლა უბრალოდ გაჩუმება აღარ შეიძლება, იმდენად გადალახა ოპოზიციის დიდმა ნაწილმა, ნაციონალურმა მოძრაობამ, მაგრამ მათში მე მოვიაზრებ ვინც მათ ღირებულებზე დადგა ან დადგომის პროცესშია. კომპრომისი ვერ იქნება ასეთ სიბინძურეებთან.

ის სტილი რითაც დაიწყო საარჩევნო კამპანია, გრძელდება. ეს კიდევ უფრო გამძაფრდება ალბათ, მომდევნო დღეებში, მომდევნო კვირებში. ეს შეიძლება იყოს მორიგი ჩანაწერების გამოქვეყნება, გაგრძელდეს ეს გვამებით მანიპულირების პოლიტიკა, რომ მიღწეული იქნეს მთავარი მიზანი, ეს მიზანი არის ისევ და ისევ ე.წ გვამების პოლიტიკა, რომელიც მათი ხელწერაა მრავალი წელია", — თქვა თეა წულუკიანმა იმედის ეთერში.

კულტურის მინისტრმა ისაუბრა იმაზეც, რომ ოპოზიციის დიდი ნაწილი არა არჩევნებისთვის, არამედ არჩევნების მომდევნო დილისთვის ემზადება. მისი შეფასებით ოპოზიცია ისტერიკაშია.

მისივე თქმით, მომდევნო დღეებში და კვირებში სუს-ზე, პოლიციასა და ჯარზე თავდასხმები მოსალოდნელია.

13 სექტემბერს ცნობილი გახდა, რომ ერთ-ერთი ღია წყაროზე სასულიერო პირებთან დაკავშირებით მასალები აიტვირთა. უცნობია, ვინ გაავრცელა ფაილები და ასევე, არ არის დადასტურებული მათი ავთენტურობა. თუმცა რამდენიმე პოლიტიკოსმა და ჟურნალისტმა, მათ შორის On.ge-ს ყოფილმა რედაქტორმა განაცხადეს, რომ ჩანაწერებში საკუთარი საუბრები ამოიცნეს.

ატვირთულია Word-ის ასობით ფაილი და იმ შემთხვევაში, თუ ისინი ავთენტურია, ჩანს, რომ შესაბამისი სამსახურები სწავლობენ სასულიერო პირების საჯარო და პირად კავშირებს, უსმენენ სატელეფონო საუბრებს და აგროვებენ კომპრომატებს პირადი ცხოვრების შესახებაც, მათ შორის, საუბარია ჰომოსექსუალურ კავშირებზე. ფაილებს შორის არის ინფორმაცია რუსული კონტაქტების, ასევე, კონკრეტული პოლიტიკური პარტიების მიმართ დამოკიდებულების შესახებ.

ჩანაწერების გამოქვეყნებიდან მეორე დღეს, სახელმწიფო უსაფრთხოების სამსახურმა განცხადება გაავრცელა, სადაც აღნიშნავს, რომ მსგავსი ინფორმაციის ტირაჟირება შეურაცხყოფს ცალკეული ადამიანების, უსაფრთხოების ოფიცრებისა და მთლიანად სამსახურის პატივსა და ღირსებას. უწყებამ მოუწოდა მედიასა და პოლიტიკურად დაინტერესებულ პირებს, გამოძიების დასრულებამდე თავი შეიკავონ არაზუსტი და გადაუმოწმებელი ინფორმაციის გავრცელებისგან.

გაიგეთ მეტი: