ახალქალაქისა და კუმურდოს მიტროპოლიტი მეუფე ნიკოლოზი, სავარაუდოდ, სახელმწიფო უსაფრთხოების სამსახურის მიერ შექმნილი ფაილების გავრცელებაში პასუხისმგებლობას სახელმწიფოს აკისრებს.

"თვითონ ის ფაქტი, რომ ისინი მისმენენ, ამისი გაჟღერება ჯერ ერთი და მეორეც ერთი, ის, რომ ამ ინფორმაციამ სადმე გაჟონოს, არის სისხლის სამართლის დანაშაული, რომელზეც პირველ რიგში, სახელმწიფოა პასუხისმგებელი. თუ მას მოპარეს ეს ინფორმაცია და გაავრცელეს, პასუხს მაინც სახელმწიფო აგებს ამაზე.

მე რა ცოდვები მაქვს ჩადენილი და რა დანაშაული მაქვს ჩადენილი, ამას გამოიგონებ, თუ ასეთი ფორმით გაავრცელებ, არავითარი განსხვავება არ არის. შენ შეგიძლია ადამიანს უთხრა ასეთი რამე, რომ თუ შენ არ ითანამშრომლებ ჩემთან, მე შენ ცუდ რამეს გაგიკეთებ, მოვიგონებ ამას თუ სხვა რამეს ვიზამ, ამას არავითარი მნიშვნელობა არ აქვს", — განაცხადა მეუფე ნიკოლოზმა ფორმულასთან საუბრისას.

გავრცელებული ჩანაწერების ნამდვილობას ადასტურებს პარტია ლელო საქართველოსთვის ლიდერი, მამუკა ხაზარაძეც. ხაზარაძის თქმით, მას სასულიერო პირთან ამ თემაზე საუბარი 2018 წლის ბოლოს, ან 2019 წლის წლის დასაწყისში ჰქონდა.

ხაზარაძე ამბობს, რომ ჩანაწერში მისი სიტყვები სრული სიზუსტითაა აღწერილი. მისივე განცხადებით ირკვევა, რომ ფაილში მოხსენიებული "ზემდგომი" ბიძინა ივანიშვილია.

დღეს ცნობილი გახდა, რომ ერთ-ერთი ღია წყაროზე სასულიერო პირებთან დაკავშირებით მასალები აიტვირთა. უცნობია, ვინ გაავრცელა ფაილები და ასევე, არ არის დადასტურებული მათი ავთენტურობა.

ატვირთულია Word-ის ასობითფაილი და იმ შემთხვევაში, თუ ისინი ავთენტურია, ჩანს, რომ შესაბამისი სამსახურები სწავლობენ სასულიერო პირების კავშირებს, უსმენენ სატელეფონო საუბრებს და აგროვებენ კომპრომატებს პირადი ცხოვრების შესახებაც, მათ შორის, საუბარია ჰომოსექსუალურ კავშირებზე. ფაილებს შორის არის ინფორმაცია რუსული კავშირების, ასევე, კონკრეტული პოლიტიკური პარტიების მიმართ სიმპათიების შესახებ.

გავრცელებულ ჩანაწერებთან დაკავშირებით ინფორმაციის მისაღებად On.ge სუს-თან დაკავშირებას შეეცადა. უწყების პრესსამსახურში, ჯერჯერობით, ჩვენს ზარებს არ პასუხობენ. მათ პასუხს მიღებისთანავე შემოგთავაზებთ.