სახელმწიფო უსაფრთხოების სამსახურის (სუს) მიერ ფარულ მიყურადებასთან დაკავშირებით გამოქვეყნებულ მასალებზე პარტია ლელო საქართველოსთვის ლიდერი, მამუკა ხაზარაძე ამბობს, რომ ჩანაწერი ნამდვილია. ხაზარაძის თქმით, მას სასულიერო პირთან ამ თემაზე საუბარი 2018 წლის ბოლოს, ან 2019 წლის წლის დასაწყისში ჰქონდა.

ხაზარაძე ამბობს, რომ ჩანაწერში მისი სიტყვები სრული სიზუსტითაა აღწერილი. მისივე განცხადებით ირკვევა, რომ ფაილში მოხსენიებული "ზემდგომი" ბიძინა ივანიშვილია.

"ვადასტურებ, რომ მქონდა საუბარი, გავეცანი შინაარს და არის ფილიგრამულად ზუსტად აღწერილი ჩემი სიტყვები. ეს საუბარი მე მქონდა დაახლოებით 2018 წელს ან 2019 წლის დასაწყისში, როდესაც ჩვენზე დაიწო მასიური, ორკესტრირებული შემოტევა. ესეც იმიტომ მივეცი ჩემს თავს უფლება, რომ მეუფე თეოდორეს დიდ პატივს ვცემ და ვიცოდი, რომ იგი ხვდებოდა აბასთუმანში ბატონ ივანიშვილს და მე მას ვთხოვე, რომ გადაეცა, როგორც ჩემთვის ნდობით აღჭურვილი პირისგან ის გზავნილი, რომ შეეჩერებინა მისი აგრესია ამხელა კომპანიების და ჩემი და ბადრი ჯაფარიძის წინააღმდეგ. იგივე მოვუწოდე საჯაროდაც", — ამბობს ხაზარაძე TV პირველთან.

გამოქვეყნებული ფაილის მიხედვით, მასზე სამართლებრივი დევნის დაწყების შემდეგ მამუკა ხაზარაძე ერთ-ერთ მიტროპოლიტს დაუკავშირდა და მას "ზემდგომთან" შუამავლობას თხოვდა. სასულიერო პირს ხაზარაძის სახელით მისთვის უნდა გადაეცა, რომ მტკიცება მისი პოლიტიკური ამბიციების შესახებ სიმართლეს არ შეესაბამება. გარდა ამისა, მიტროპოლიტს ადრესატი საქმის კურსში უნდა ჩაეყენებინა, რომ ხაზარაძემ სხვადასხვა უწყებაში მსოფლიოს უდიდესი საერთაშორისო კომპანიის მიერ შედგენილი დასკვნა გადააგზავნა და "თუ ვინმეს უნდა მის წინააღმდეგ უმიზეზოდ ბრძოლა, ამ შეთხვევაში არ დანებდება". ფაილის მიხედვითვე, ამავე თემაზე ხაზარაძე საქართველოს კათალიკოს-პატრიარქ ილია II–საც შეხვდა.

მოპოვებული ინფორმაციით, თიბისი ბანკის დამფუძნებელმა, მამუკა ხაზარაძემ ქორეპისკოპოს თოედორე ჭუაძეს აცნობა, რომ მიმდინარე წლის 12 თებერვალს საპატრიარქოში მოინახულა კათალიკოს პატრიარქი ილია II და ესაუბრა ბოლო დროს ბანკზე განხორციელებულ თავდასხმებზე (ვიზიტის შესახებ ინფრომაცია არ დადასტურებულა).

ხაზარაძის თქმით, იგი ფლობს ინფორმაციას, რომ გარკვეული პირები "ზემდგომს" არწმუნებენ მის (ხაზარაძის) პოლიტიკურ ამბიციებში, რაც სინამდვილეს არ შეესაბამება და უმჯობესი იქნება თუ ვინმე დაამშვიდეს მას (ზემდგომს), რადგან თუ ეს ასე გაგრძელდა მაშინ ყველასთვის ცუდად დამთავრდება ეს ამბავი.

ხაზარაძის განმარტებით, მან სხვადასხვა უწყებაში უკვე დააგზავნა მსოფლიოს უდიდესი საერთაშორისო კომპანიის მიერ შედგენილი დასკვნა, რომლითაც ყველაფერი ნათქვამია და თუ ვინმეს უნდა მის წინააღმდეგ უმიზეზოდ ბრძოლა, ამ შეთხვევაში არ დანებდება. მისივე განმარტებით, ის სავსებით ნორმალური ადამიანია, რომელსაც კარგად ესმის ყველაფერი, არავითარ შემთხვევაში არ შეეგუება უსამართლობას და თავს არავის დააჩაგვრინებს.

ხაზარაძემ ჭუაძეს სთხოვა, აღნიშნულის შესახებ "ზემდგომი" საქმის კურსში ჩაეყენებინა, რაზეც ქორეპისკოპოსმა განუცხადა, რომ ამბის ადრესატამდე მიტანას შეეცდება", — წერია ფაილში.

დღეს ცნობილი გახდა, რომ ერთ-ერთი ღია წყაროზე სასულიერო პირებთან დაკავშირებით მასალები აიტვირთა. უცნობია, ვინ გაავრცელა ფაილები და ასევე, არ არის დადასტურებული მათი ავთენტურობა.

ატვირთულია Word-ის ასობით ფაილი და იმ შემთხვევაში, თუ ისინი ავთენტურია, ჩანს, რომ შესაბამისი სამსახურები სწავლობენ სასულიერო პირების კავშირებს, უსმენენ სატელეფონო საუბრებს და აგროვებენ კომპრომატებს პირადი ცხოვრების შესახებაც, მათ შორის, საუბარია ჰომოსექსუალურ კავშირებზე. ფაილებს შორის არის ინფორმაცია რუსული კავშირების, ასევე, კონკრეტული პოლიტიკური პარტიების მიმართ სიმპათიების შესახებ.