ჟურნალისტი ლაშა დვალიშვილი ტელეკომპანია რუსთავი 2-ში სპორტის მიმართულების პროდიუსერად იმუშავებს. დვალიშვილი არხის მენეჯმენტის შეთავაზებას უკვე დათანხმდა და მუშაობას მომავალი კვირიდან იწყებს. ამის შესახებ მან On.ge-ს განუცხადა.

"ქართულ ტელესივრცეში ერთ-ერთი ყველაზე რეიტინგული ტელეკომპანიაა და არ მგონია, ჩემს ადგილზე ვინმეს დიდი ხანი ეფიქრა, გამომდინარე არხის კონცეფციიდან და რეიტინგიდან," - აღნიშნა დვალიშვილმა.

On.ge-ს აინტერესებდა რატომ შეაჩერა რუსთავი 2-ის მენეჯმენტმა დვალიშვილზე არჩევანი, თუმცა, მათთან დაკავშირება ვერ მოხერხდა.

დვალიშვილმა მუშაობა 16 წლის ასაკში მეორე არხში დაიწყო. წლების განმავლობაში იყო ტელეკომპანიების იმედის, პირველი არხისა და მზის სპორტის ახალი ამბების წამყვანი და ფეხბურთის ფედერაციის პრესსამსახურის ხელმძღვანელი.

რამდენიმე დღეა კურიერის მთავარ გამოშვებაში სპორტის ახალი ამბები აღარ ხვდება. 15 მარტს ცნობილი გახდა, რომ დიმა ობოლაძე, რომელიც მანამდე რუსთავი 2-ში სპორტის მიმართულებით მუშაობდა ტელეკომპანია იმედში იწყებს იმავე თანამდებობაზე მუშაობას.

ლაშა დვალიშვილი რუსთავი 2-ზე სპორტის მიმართულების პროდიუსერი ხდება