პროკურატურის ინფორმაციით, საქართველოს თავდაცვის სამინისტროს სამხედრო პოლიციის ყოფილი ხელმძღვანელი, მეგის ქარდავა უკრაინაშია დაკავებული და ამ დროისთვის მისი საქართველოში ექსტრადიციის პროცედურა მიმდინარეობს. ამ ეტაპზე მეტ დეტალს უწყება არ აკონკრეტებს.

სამაგიეროდ, ექსტრადირების შესახებ სოციალურ ქსელში აქვეყნებს პოსტს თავად მეფის ქარდავა. ფეისბუქპოსტში, რომელშიც მითითებულია, რომ ამ ინფორმაციას ქარდავას სახელით მისი ცოლი აქვეყნებს, ვკითხულობთ, რომ პროცედურა დაჩქარებულია.

ქარდავა წერს, რომ მისი საქართველოში ექსტრადირება უკრაინასა და საქართველოს შორის "პოლიტიკური შეთანხმების აქტია" და ამ ამბავს წინასაარჩევნო კამპანიას უკავშირებს.

"[ექსტრადირება] უკავშირდება პოლიტიკური პატიმრების, ჩვენი უკრაინელი ძმების ქოცხელისუფლების ტყვეობიდან დახსნას, ანუ წარმოადგენს არაფორმალურ გაცვლას ორ სახელმწიფოს შორის, რომელიც ასევე გამოყენებული იქნება ქართული ოცნების მიერ ტრადიციული რუსული ღვარძლისა და ზიზღის პროპაგანდაზე დაფუძნებული წინასაარჩევნო კამპანიისთვის", — წერს ქარდავა.

ის აცხადებს, რომ ამ "გაცვლის" მიუხედავად უკრაინას უსურვებს ჩვენს საერთო მტერზე, რუსეთზე გამარჯვებას და აცხადებს, რომ "საქართველოს და უკრაინის ძმობას ვერასდროს შეარყევს რუსული ჰიბრიდული ომის მწარმოებელი ოლიგარქ ივანიშვილის რუსული მარიონეტული რეჟიმი".

ქარდავა მიმართავს სახალხო დამცველს, — მისი თქმით, ეს ერთადერთი სახელმწიფო ინსტიტუტია, რომელიც "ჯერჯერობით გამართულად ფუნქციონირებს" — ასევე, საერთაშორისო ორგანიზაციებს დაიცვან მისი ინტერესები და უსაფრთხოება.

მეგის ქარდავას უკრაინაში დაკავების შესახებ ინფორმაცია 2017 წელს გავრცელდა. იქამდე, ის ინტერპოლით წითელი ცირკულარით იძებნებოდა.

სააპელაციომ საქალაქო სასამართლოს გადაწყვეტილება, რომელმაც სერგო თეთრაძის წამების საქმეზე ქარდავა გაამართლა, შეცვალა და ყოფილ მაღალჩინოსანს პატიმრობა მიუსაჯა. მას დაუსწრებლად ცხრა წლით თავისუფლების აღკვეთა აქვს შეფარდებული. სასამართლოს გადაწყვეტილებით, ის დამნაშავედ სცნეს 144-ე და 138-ე მუხლებით, რაც სექსუალური ხასიათის ძალმომრეობასა და წამებას გულისხმობს.