ტელეკომპანია იმედი ყოფილ პრემიემინისტრმ გიორგი გახარიას ეთერის დათმობაზე უარს ეუბნება და აცხადებს, რომ გახარიამ ნაციონალური მოძრაობის მმართველობა და მათ დროს არსებული მედიაგარემო ქართულ მედიასივრცეში დღეს არსებულ მოცემულობასთან კიდევ ერთხელ გააიგივა. იმედის განცხადებით, გახარიამ შეურაცხყოფა მიაყენა მათ არხს და მის თანამშრომლებს, როცა ბრალი დასდო, თითქოს ისინი მაყურებელს რეალობას უმალავენ და მოდელირებულ ქრონიკებს დგამენ.

"ასეთი დემაგოგიური საუბარი იყო და არის ნაციონალური მოძრაობის ხელწერა და ჩვენთვის კატეგორიულად მიუღებელია.

2007 წლის 7 ნოემბერს, მაშინდელმა ხელისუფლებამ, მრავალი დამოუკიდებელი სახელმწიფო ორგანოს მონაწილეობით (პროკურატურა, სასამართლო, პოლიცია, და მრავალი სხვა) დაარბია ჩვენი არხი და შემდეგ მოახდინა მისი ექსპროპრიაცია. 2012 წლამდე იმედს, ისევე როგორც ქვეყანაში არსებულ ყველა მნიშვნელოვან მედიაორგანიზაციას, აკონტროლებდა ნაციონალური მოძრაობა და მათ მიერ ხელდასმული მფლობელები. ზუსტად იმ პერიოდს ეკუთვნის მოდელირებული ქრონიკა და მახინჯი ჟურნალისტიკის სხვა მაგალითები იმედზე. ძალიან მნიშვნელოვანია ეს არავინ დაივიწყოს!", — აცხადებს იმედი.

ტელევიზია დასძენს, რომ მათ შეურაცხყოფასთან ერთად, ნახეს მოთხოვნა იმ გადაცემებში მონაწილეობის შესახებ, რომლებსაც ყოფილი პრემიერი მოდელირებულ ქრონიკას უწოდებს.

"იმედი არის საქართველოში ყველაზე მაღალრეიტინგული ტელეკომპანია, რომელიც საზოგადოების ყველაზე მაღალი ნდობით სარგებლობს. აღნიშნულის გათვალისწინებით, კვალიფიციური თუ არაკვალიფიციური საარჩევნო სუბიექტების სურვილი, საკუთარი თავი იხილონ ჩვენს ეთერში, სრულიად ბუნებრივია, თუმცა ჩვენი არხი ვერ იმოქმედებს ნაციონალური მოძრაობისა და მათთან ღიად თუ ფარულად დაკავშირებული პოლიტიკოსების მოთხოვნების საფუძველზე", — ნათქვამია სამთავრობო ტელეკომპანიის განცხადებაში.

მათივე თქმით, მათ ყოველთვის ჰვქონდათ კითხვები იმასთან დაკავშირებით, თუ რატომ გადადგა თანამდებობიდან გიორგი გახარია და ამით მიეცა საშუალება ნაციონალურ მოძრაობას, მორიგი კრიზისი შეექმნა ქვეყანაში.

"ტელეკომპანია იმედი არის დამოუკიდებელი, კერძო კომპანია, რომლის ერთ-ერთი მთავარი მიზანია, არ დაუშვას ნაციონალური მოძრაობის რევანში საქართველოში. ამ მიზნის და საქართველოს კანონმდებლობის ფარგლებში, ის თვითონ წყვეტს ვინ, როდის და რა ამპლუაში მოიწვიოს ტელეარხზე", — აცხადებს იმედი.

საქართველოს ექსპრემიერმა და პარტია საქართველოსთვის ლიდერმა, გიორგი გახარიამ ტელეკომპანია იმედზე პირდაპირ ეთერი კიდევ ერთხელ გუშინ, 8 სექტემბერს მოითხოვა. მისი თქმით, იმედი ცალმხრივად აშუქებს მოვლენებს, მაყურებელს რეალობას უმალავს და ყველას აძლევს შესაძლებლობას, ლანძღოს ის.

გახარიამ, ასევე, აღნიშნა, რომ იმედს "ჯერ ნაციონალური მოძრაობა აიძულებდა", ახლა კი ქართული ოცნება აიძულებს "მოდელირებული ქრონიკებით", "ცალმხრივი ინფორმაციით" ასაზრდოონ მაყურებელი.

მიმდინარე წლის მაისში ექსპრემიერთან ინტერვიუს, სადაც მხოლოდ ტელევიზიების თოქ შოუების წამყვანები იყვნენ მიწვეული, ტელეკომპანია იმედისა და POS TV-ს ჟურნალისტები არ დაესწრნენ, რის შემდეგაც გახარიამ იმედს პოლიტიკურად მოტივირებული და მართული ტელევიზია უწოდა.