კახეთის რწმუნებული, ირაკლი შიოშვილი აცხადებს, რომ ჯერჯერობით არ აქვთ ინფორმაცია, რას ითხოვს ყვარელში, საქართველოს ბანკის ფილიალში შეჭრილი შეიარაღებული პირი.

"არის სხვადასხვა ვერსია, მათ შორის თანხის მოთხოვნა, ზუსტი ინფორმაცია დგინდება, მიმდინარეობს მასთან კომუნიკაცია. ვინც არის ოპერაციაში ჩართული, ყველა ის ადამიანი აწარმოებს მოლაპარაკებას და ცოტა ხანში გვექნება სათანადო შედეგიც", — განაცხადა შიოშვილმა მაესტროსთან.

ყვარლის მერის, როსტომ სესიაშვილის თქმით, ჯერჯერობით მძევლებთან და მოთხოვნებთან დაკავშირებით არანაირი დაზუსტებული ინფორმაცია არ არსებობს.

"სპეცდანიშნულების რაზმი ადგილზეა. ამ დროისათვის დამატებით არაფერი შემეძლია გითხრათ. მაქსიმალურად ვინარჩუნებთ სიმშვიდეს და გვაქვს მოლოდინი, რომ მშვიდობიანად დასრულდება.", — აცხადებს სესიაშვილი.

ერთ-ერთი თვითმხილველის ინფორმაციით, რომელიც ამბობს, რომ საქართველოს ბანკის თანამშრომელია, თავდამსხმელს ხელყუმბარა აქვს და შენიღბულია.

"შევედი, უნდა დამელაგებინა დაწესებულება, როგორც კი შევედი და კარი შევაღე, ეს კაცი გამოვარდა ლიმონკით ხელში და დაიყვირა, გადით ახლავე გარეთო. მე გამოვედი, შიგნით დარჩნენ ადამიანები", — ამბობს-ის.

საქართველოს შინაგან საქმეთა სამინისტროს ინფორმაციით, ყვარელში, საქართველოს ბანკის ფილიალში შეჭრილია შეიარაღებული პირი. მათივე განცხადებით, უწყების თანამშრომლები ადგილზე მობილიზებული არიან. უწყებაში არ აკონკრეტებენ, ჰყავს თუ არა მძევლები ბანკში შეჭრილ პირს.